მიკროფონით კრემლის სპიკერი, დმიტრი პესკოვი დგას.7 იანვარს რუსეთის პრეზიდენტი ვლადიმერ პუტინი სირიაში, დამასკოში ჩავიდა, სადაც სირიის პრეზიდენტს ბაშარ ალ-ასადს შეხვდა.
პუტინმა ასადს უთხრა, რომ სირიის სახელმწიფოებრიობის აღდგენისთვის ბევრი გაკეთდა, ასადმა კი რუსეთის პრეზიდენტს მადლობა გადაუხადა სირიაში მშვიდობიანი ცხოვრების აღდგენაში მისი დახმარებისთვის. ამის შესახებ ინტერფაქსი კრემლის ციტატაზე დაყრდნობით წერს.
სირიული მედიის ინფორმაციით, შეხვედრაზე მათ სირიაში რუსული ძალების სამხედრო მეთაურის პრეზენტაციას მოუსმინეს.
სხვა ინფორმაცია, ჯერჯერობით, უცნობია.
ეს პუტინის პირველი ვიზიტია 2017 წლის შემდეგ, როდესაც რუსეთის პრეზიდენტი ლატაკიას პროვინციაში ჰმეიმიმის საჰაერო ბაზას ესტუმრა.
რამდენიმე დღის წინ ირანი, რომელიც ასადის რეჟიმის ერთერთი მთავარი მოკავშირეა, აშშ-ს ირანელი გენერლისა და ტერორისტის ყასემ სოლეიმანის განადგურების გამო შურისძიებით დაემუქრა.
აღსანიშნავია ისიც, რომ 27 დეკემბერს დონალდ ტრამპმა Twitter-ზე დაწერა, რომ რუსეთი, სირია და ირანი ხოცავენ, ან ემზადებიან დახოცონ ათასობით უდანაშაულო მშვიდობიანი მოქალაქე იდლიბის პროვინციაში - "არ გააკეთოთ ეს! თურქეთი ბევრს მუშაობს ხოცვა-ჟლეტის შესაჩერებლად".
სამი დღის წინ სირიაში, იდლიბის პროვინციაში, ქალაქ სარმინში სარაკეტო დარტყმამ 5 ბავშვის და 4 ზრდასრული ადამიანის სიცოცხლე იმსხვერპლა. "ეროვნული განმათავისუფლებელი ფრონტის" სპიკერი ნაჯი აი მუსტაფა ამბობს, რომ ბომბი, რომლითაც დარტყმა განხორციელდა, რუსულია, სახელწოდებით "ტოჩკა".
შეგახსენებთ, რომ ასადის რეჟიმმა და რუსეთმა საჰაერო თავდასხმა და სახმელეთო კამპანია ოპოზიციის უკანასკნელ პოზიციებზე მიმდინარე წლის 26 აპრილს დაიწყეს. მას შემდეგ 11,500-ზე მეტი საჰაერო თავდასხმა განხორციელდა. მათ შორის გამოიყენეს იარაღი, რომელსაც საერთაშორისო კანონმდებლობა კრძალავს. თავდასხმების სამიზნეს სამოქალაქო ობიექტები, მათ შორის სკოლები და საავადმყოფოებიც წარმოადგენდა.
რუსეთმა და თურქეთმა 2018 წლის სექტემბერში იდლიბთან დაკავშირებით ცეცხლის შეწყვეტის შეთანხმებას მიაღწიეს, რომლის მიხედვითაც ტერიტორიაზე მათ ერთობლივი პატურლირება უნდა განეხორციელებინათ და რადიკალური ელემენტებისაგან გაეთავისუფლებინათ. მიუხედავად ამისა, მას შემდეგ, რაც 2019 წლის იანვარში ტერიტორიის ნაწილზე დაჯგუფება ჰურიათ თაჰრირ ალ-შამმა კონტროლი დაამყარა, ასადმა მოკავშირეებთან ერთად იდლიბზე თავდასხმა დაიწყო.
მონიტორიგნის ორგანიზაციების ინფორმაციით 2019 წლის აპრილის შემდეგ სირიის მთავრობისა და რუსეთის შეიარაღებული ძალების მიერ ჩატარებულმა დაბომბვებმა ოპოზიციის მიერ კონტროლირებად ტერიტორიებზე 1,300-მდე ადამიანის სიცოცხლე იმსხვერპლა და მილიონამდე ადამიანს საცხოვრებლის მიტოვება მოუხდა.
დეკემბერში ერდოღანმა თქვა, რომ იდლიბის პროვინციიდან ასადის რეჟიმისა და რუსეთის მიერ განხორციელებული დაბომბვის გამო თურქეთის საზღვრისაკენ 80,000-ზე მეტი ადამიანი დაიძრა. მისივე თქმით თურქეთს მიგრანტების ახალ ნაკადთან გამკლავება არ შეუძლია და ახალ ნაკადს ყველა ევროპული ქვეყანა იგრძნობს.
