საქართველოს ახალგაზრდა იურისტთა ასოციაციის აჭარის ორგანიზაციის ხელმძღვანელის მოადგილე, ნინო ტავლალაშვილი აცხადებს, რომ ავტომობილი, რომლითაც "ბათუმის სახლის" მფლობელი საბირ ნურიევი გადაადგილდებოდა, ბათუმში, საპატრულო პოლიციის ეზოში დგას. ამის შესახებ ინფორმაციას სააგენტო ინტერპრესნიუსი ავცრელებს,
"ამ მანქანით რომ გადაადგილდებოდა "ბათუმის სახლის" მეპატრონე, ისედაც ვიცოდით, იქიდან გამომდინარე, რომ რამდენჯერმე მასთან ურთიერთობისას დავინახეთ, როგორ მართავდა მანქანას. შემდგომ უკვე, გუშინ ავტომობილი საპატრულოს ეზოში აღმოვაჩინეთ. ნურიევს ვუკავშირდებოდით, მაგრამ ტელეფონი გამორთული ჰქონდა", - აღნიშნა ტავლალაშვილმა.
შეგახსენებთ, საიას წარმომადგენლებსა და აჭარის პოლიციის სამხარეო სამმართველოს უფროს ვალერიან თელიას შორის ინციდენტი "ბათუმის სახლთან" დამონტაჟებულმა ვიდეოთვალმა დააფიქსირა. ობიექტის მფლობელმა საბირ ნურუევმა იმავე დღეს განაცხადა, რომ პოლიციის თანამშრომლებმა ჩანაწერი ამოიღეს, რომლის ნაწილი შემდეგ წაშლილი აღმოჩდა. შსს-ს გენერალურმა ინსპექციამ განაცხადა, რომ ჩანაწერის წაშლა დაუდევრობით მოხდა.
დღეს, ჟურნალისტებთან გამართულ შეხვედრაზე, საიას თავმჯდომარემ, კახა კოჟორიძემ განაცხადა, რომ ინციდენტის ადგილთან ახლოს მდებარე ობიექტის, "ბათუმის სახლის" მეპატრონე, შიშის გამო, საქართველოს დატოვებას აპირებდა.
''ბათუმის სახლი" დაკეტილი იყო 2-3 დღის განმავლობაში, მისი მეპატრონე შეშინებული იყო და ჩემთან სატელეფონო საუბარში თქვა, რომ საქართველოდან წასვლა უნდა. ამ განცხადების შემდეგ ობიექტი მართლა დაიკეტა და ეს ადამიანი აღარ ჩანდა, შსს მას ეძებდა, თუმცა გარკვეული დროის განმავლობაში ვერ პოულობდა", - აღნიშნა კოჟორიძემ და დასძინა, რომ არ ფლობს ინფორმაციას, გაიხსნა თუ არა ობიექტი და მოხერხდა თუ არა მისი მეპატრონის პოვნა.