იუსტიციის მინისტრის მოადგილედ გოჩა ლორთქიფანიძე დაინიშნა. იუსტიციის მინისტრი თეა წულუკიანი ახალ მოადგილეს დღეს წარადგენს.
გოჩა ლორთქიფანიძე იუსტიციის სამინისტროში ოთხი დეპარტამენტის მუშაობას გაუწევს კოორდინაციას. მას დაექვემდებარება შემდეგი დეპარტამენტები: საერთაშორისო საჯარო სამართლის, არბიტრაჟებსა და უცხო ქვეყნის სასამართლოებში სახელმწიფო წარმომადგენლობის, ადამიანის უფლებათა საერთაშორისო სასამართლოებში სახელმწიფო, აგრეთვე - ხელშეკრულებათა ექსპერტიზისა და სასამართლო წარმომადგენლობის.
სამინისტროს მიერ გავრცელებული ინფორმაციით, გოჩა ლორთქიფანიძე იურისტია, განათლება მიიღო საქართველოსა და დასავლეთის ქვეყნების უნივერსიტეტებში, აქვს სამეცნიერო-პედაგოგიური მუშაობის გამოცდილება ევროპისა და აშშ-ის წამყვან კვლევით ცენტრებში. სხვადასხვა დროს მუშაობდა როგორც სახელმწიფო, ისე საერთაშორისო ორგანიზაციებში.
