სტუდენტური მოძრაობა ლაბორატორია 1918-ის წევრი სანდრო ცაგარელი გათავისუფლებულია. სანდრო ცაგარელს პოლიციისთვის წინააღმდეგობის გაწევის მუხლით ჯარიმა დაეკისრა 400 ლარის ოდენობით. მან უკვე დატოვა საქალაქო სასამართლო.
შეგახსენებთ, სანდრო ცაგარელი გუშინ, თსუ-ს პირველი კორპუსის ეზოში გამართული საპროტესტო კონცერტის შემდეგ დააკავეს.
შსს-ს ინფორმაციით, ცაგარელმა სამართალდამცავებს სიტყვიერი შეურაცხყოფა მიაყენა.
განსხვავებული ვერსია აქვთ სხვა აქტივისტებს, რომლებიც მომხდარს შეესწრნენ: ორმა მათგანმა ტელეკომპანია მაესტროს ეთერში განაცხადა, რომ სანდრო ცაგარელი ქუჩაში ტაქსის გაჩერებას ცდილობდა, პოლიციამ ის სრულიად უმიზეზოდ მანქანაში ჩასვა და წაიყვანა.