გავრცელებული ცნობებით , ბოლო 2 დღეში სულ ცოტა 20 ადამიანის სიცოცხლე ემსხვერპლა ეგვიპტეში, პოლიციელებსა და დემონსტრანტებს შორის შეტაკებებს. ორშაბათს პოლიციამ კაიროს ტაჰრირის მოედნის დემონსტრანტებისგან გათავისუფლება ცრემლსადენი გაზის და რეზინის ტყვიების გამოყენებით სცადა. კაიროს ცენტრში შეტაკებები დღესაც გრძელდებოდა. ქვეყნის ჯანდაცვის სამინსიტრო იუწყება, რომ 1700-ზე მეტი ადამიანია დაშავებული. დემონსტრანტები მოითხოვენ, ქვეყანა სწრაფად გადავიდეს სამოქალაქო მმართველობაზე. ეგვიპტეში საპარლამენტო არჩევნები ერთ კვირაში უნდა გაიმართოს, არეულობა კი ეჭვის ქვეშ აყენებს არჩევნების ჩატარებას. ესაა ყველაზე დიდი საპროტესტო გამოსვლა ეგვიპტეში მუბარაკის მთავრობის დამხობის შემდეგ. გამოსვლები შაბათს დაიწყო. დემონსტრანტები შიშობენ, რომ დროებითი სამხედრო ხელმძღვანელობა არჩევნების შემდეგაც დარჩება ხელისუფლებაში.
ეგვიპტე
