საშუალო ხელფასის დინამიკა

საქსტატის 2011 წლის მეორე კვარტლის მონაცემებით, წინა წლის ანალოგიურ პერიოდთან შედარებით, სამეწარმეო და არასამეწარმეო დარგებში საშუალო თვიური ხელფასის ოდენობა 13.9% და 13%-ით გაიზარდა.

სამეწარმეო სფეროში ყველაზე მაღალანაზღაურებადი პროფესია უძრავი ქონებით ოპერაციები, იჯარა და მომხმარებლისთვის მომსახურების გაწევაა (საშუალო თვიური ხელფასი – 882.9 ლარი), ყველაზე დაბალანაზღაურებადი კი – თევზჭერა-მეთევზეობა (საშუალო თვიური ხელფასი – 276.3 ლარი). არასამეწარმეო სფეროში ყველაზე მაღალანაზღაურებადია საფინანსო საქმიანობა (საშუალო თვიური ხელფასი – 1476.3 ლარი), ხოლო ყველაზე დაბალანაზღაურებადი – განათლება (საშუალო თვიური ხელფასი – 308.2 ლარი).

სამეწარმეო დარგში მაღალანაზღაურებადი პროფესიების სამეულში ტრანსპორტი და კავშირგაბმულობა შედის (საშუალო თვიური ხელფასი – 868.3 ლარი) და ელექტროენერგიის, აირისა და წყლის წარმოება და განაწილება (საშუალო თვიური ხელფასი – 862 ლარი). ამ პროფესიების საშუალო თვიური ანაზღაურება, 2007-2011 წლების მეორე კვარტალში, ყოველწლიურად 15.9%-ით გაიზარდა.

არასამეწარმეო დარგში მაღალანაზღაურებადი პროფესიების სამეულში, სახელმწიფო მმართველობა (საშუალო თვიური ხელფასი – 1046 ლარი) და ჯანმრთელობის დაცვა და სოციალური დახმარება (საშუალო თვიური ხელფასი – 723.3 ლარი) შედის. ამ პროფესიების საშუალო თვიურმა ანაზღაურებამ, 2007-2011 წლების მეორე კვარტალში, ყოველწლიურად 21.4%-ით მოიმატა.

სამეწარმეო და არასამეწარმეო დარგებში ყველაზე დაბალანაზღაურებადი პროფესიები, იმავე პერიოდში, შესაბამისად, საშუალოდ 30% და 23%-ით გაიზარდა.

არასამეწარმეო დარგის ცხრა პროფესიის საშუალო თვიური ანაზღაურება, 2007-2011 წლების მეორე კვარტალში, ყოველწლიურად 23.7%-ით, სამეწარმეო დარგის 13 პროფესიისა კი – 16.4%-ით იზრდებოდა.