ირანში ვალუტის კოლაფსითა და მზარდი ინფლაციით გამოწვეული საპროტესტო აქციების ფონზე, აშშ-ს პრეზიდენტი, დონალდ ტრამპი წერს, რომ თუკი ირანი მშვიდობიან დემონსტრანტებს დახოცავს, აშშ მათ გადასარჩენად "მზად არის".
ამის შესახებ ტრამპი Truth Social-ზე წერს.
"თუკი ირანი ესვრის და ძალადობრივად დახოცავს მშვიდობიან დემონსტრანტებს, რაც მათი ჩვეულებაა, აშშ მათ გადაარჩენს". - წერს ტრამპი.
ცნობისთვის, ირანში ვალუტის კოლაფსითა და მზარდი ინფლაციით გამოწვეული საპროტესტო აქციებზე დემონსტრანტებსა და პოლიციას შორის დაპირისპირებებს მსხვერპლი მოჰყვა.
ამის შესახებ ინფორმაციას ადამიანის უფლებადამცველი ორგანიზაცია, Hengaw და ირანის რეჟიმის მხარდამჭერი საინფორმაციო სააგენტო, Fars ავრცელებს.
როგორც Fars-ის, ისევე Hengaw-ის ცნობით, გუშინ, 1 იანვარს, ქალაქ ლორდეგანში აქციებზე ორი ადამიანი დაიღუპა. Fars-ს მათი ვინაობა არ დაუკონკრეტებია, თუმცა Hengaw-ის მიხედვით, ორივე მათგანი აქციის მონაწილე იყო. ამასთან, Fars ასევე ავრცელებს ინფორმაციას, რომ ლურისტანის ოსტანში, ქალაქ ეზნასა და კუჰდეშტში დამატებით სამი ადამიანი დაიღუპა.
ცნობისთვის, გუშინ ფარსის ოსტანში დემონსტრანტებმა ადგილობრივ სამთავრობო შენობაში შეჭრა სცადეს. მაღალჩინოსნებმა განაცხადეს, რომ დაშავდა სამი პოლიციელი, ხოლო ქალაქ ფასაში ოთხი ადამიანი დააკავეს.
BBC-ს მიხედვით, კიდევ ერთ ვიდეოში ჩანს, რომ დაცვის პოლიცია საპასუხო ცეცხლს ხსნის და ცრემლსადენ გაზს იყენებს.
ქალაქის გუბერნატორმა სამთავრობო მედიას განუცხადა, რომ "საპროტესტო აქციები ინფლაციამ და ეკონომიკურმა პირობებმა გამოიწვია. მათში მონაწილეობა მიიღეს მტრული არხებისა და მედიის გავლენის ქვეშ მყოფმა პირებმა... სიტუაცია ნორმალურ მდგომარეობას დაუბრუნდა."
29 დეკემბერს ირანის დედაქალაქ თეირანში და ქვეყნის სხვა ქალაქებში მზარდი ინფლაციისა და ეროვნული ვალუტის კოლაფსის ფონზე საპროტესტო აქციები დაიწყო.
New York Times წერდა, რომ დეკემბრის ბოლოს ირანის ვალუტა აშშ-ს დოლართან მიმართებით ისტორიულ მინიმუმამდე დაეცა, ხოლო დეკემბერში წლიურმა ინფლაციამ 42.2 პროცენტს მიაღწია.
ამასთან, ადგილობრივი მედიის ცნობით, 29 დეკემბერს ირანის ცენტრალური ბანკის ხელმძღვანელმა, მოჰამად რეზა ფარზინმა გადადგომის შესახებ განაცხადა.
28 დეკემბერს ირანის პრეზიდენტმა, მასუდ ფეზეშკიანმა პარლამენტში 2026 წლის ბიუჯეტის პროექტზე საუბრისას კრიზისის მასშტაბი აღიარა.
"ამბობენ - 'ხელფასები გაზარდეთ' - საიდან მოვიტანოთ ფული?" - განაცხადა მან. არსებული მდგომარეობა ფეზეშკიანმა წინა მთავრობების, პარლამენტებისა და ოფიციალური პირების მიერ მიღებულ გადაწყვეტილებებს დააბრალა.
