ტაბულამ FlightRadar24-ის მონაცემების გადამოწმებით დაადგინა, რომ საქართველო-აზერბაიჯანის საზღვართან ჩამოვარდნილი თვითმფრინავი თურქეთის საჰაერო ძალების სამხედრო სატვირთო თვითმფრინავი Lockheed C-130 Hercules არის, ბორტის ნომერი 68-01609.
FlightRadar24-ის მონაცემების მიხედვით, თვითმფრინავი განჯის აეროპორტიდან აფრინდა და აზერბაიჯანის ტერიტორიიდან, საქართველოს გავლით, სავარაუდოდ, თურქეთის მიმართულებით მიფრინავდა.
თვითმფრინავმა რადარზე მოძრაობა თბილისის დროით 14:49-ზე შეწყვიტა, როცა ის ჯერ კიდევ საქართველოს ტერიტორიის მაღლა იმყოფებოდა. 1 წუთის შემდეგ თვითმფრინავი რადარიდან გაქრა. მონაცემების მიხედვით, ამ დროს თურქული თვითმფრინავი სიღნაღის მუნიციპალიტეტის ტერიტორიის ზემოთ, ქოლაგირის მონასტრის მახლობლად დაფრინავდა.
აქამდე სოციალურ ქსელებში ქართულმა მედიებმა გაავრცელეს ვიდეო, რომელშიც საქართველო-აზერბაიჯანის სასაზღვრო ტერიტორიაზე თვითმფრინავის ჩამოვარდნა ჩანდა. როგორც კადრებში ჩანს, სატვირთო თვითმფრინავი ნაწილებად დაშლილი ვარდება. მას აკლია წინა და კუდის ნაწილები.
