ჯაიანის ადვოკატი: მოსამართლე გავლენის ქვეშ მოექცა, განაჩენი უკანონოა - გავასაჩივრებთ

კესარია აბრამიძის განზრახ მკვლელობისთვის დაკავებული ბექა ჯაიანის ადვოკატი აცხადებს, რომ თბილისის საქალაქო სასამართლოს განაჩენს სააპელაციო სასამართლოში გაასაჩივრებენ.

დღეს, 16 აპრილს, თბილისის საქალაქო სასამართლოს მოსამართლე ნინო გალუსტაშვილმა ბექა ჯაიანი ყველა წარდგენილ ბრალდებაში დამნაშავედ ცნო და უვადო თავისუფლების აღკვეთა მიუსაჯა.

"ვფიქრობთ, ახლადდანიშნულმა მოსამართლემ თავისი პირველი პრაქტიკული გამოცდა ვერ ჩააბარა წარმატებით, მოექცა გავლების ქვეშ, ვინაიდან უვადო თავისუფლების აღკვეთასთან დაკავშირებით გადაწყვეტილება მიიღო მხოლოდ მორალური თვალსაზრისით და არა სამართლებრივ საფუძვლებზე დაყრდნობით. შესაბამისად, აღნიშნული განაჩენი არის უკანონო და დაცვის მხარის მხრიდან გასაჩივრდება სააპელაციო სასამართლოში.

ეს განაჩენი არის უკანონო გენდერის ნაწილში და განსაკუთრებული სისასტიკის ნაწილში, ასევე სისტემატურ ცემასთან დაკავშირებით". - განაცხადა ბექა ჯაიანის ადვოკატმა გიორგი მდინარაძემ.

კესარია აბრამიძის მკვლელობაში ბრალდებულ ბექა ჯაიანს უვადო პატიმრობა მიესაჯა

18 სექტემბერს ტრანსგენდერი ქალი, კესარია აბრამიძე სამართალდამცველებმა საკუთარ სახლში, დიდ დიღომში, ავთანდილის ქუჩის 8 ნომერში მოკლული იპოვეს.

კესარია აბრამიძის მკვლელობაში ბრალდებული, ბექა ჯაიანი 19 სექტემბერს დააკავეს და აღკვეთის ღონისძიების სახით პატიმრობა 20 სექტემბერს შეეფარდა.

პროკურატურის ცნობით, დაკავებულს ბრალდება 109-ე მუხლის "თ" და "მ" ქვეპუნქტებით წარედგინა, რაც გენდერის ნიშნით, განსაკუთრებული სისასტიკით განზრახ მკვლელობას გულისხმობს და სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.