OPEC-ის წევრი ქვეყნების მხრიდან ნავთობის წარმოების გაზრდის დაანონსების პარალელურად და მას შემდეგ, რაც აშშ-ს პრეზიდენტმა დონალდ ტრამპმა 2 აპრილს სავაჭრო პარტნიორი სახელმწიფოების წინააღმდეგ საყოველთაო ტარიფები გამოაცხადა, მსოფლიო ბაზარზე ნავთობის ფასებმა ვარდნა დაიწყო და, 4 აპრილის მონაცემებით, 2021 წლის კორონავირუსის პანდემიის პერიოდის მაჩვენებლისკენ მიემართებოდა.
ნიშნული კიდევ უფრო ჩამოვარდა, როდესაც დღეს ჩინეთმა დააანონსა, რომ აშშ-დან იმპორტირებულ პროდუქციაზე დამატებით 34%-იან ტარიფებს დააწესებს.
ჩინეთის კომერციის მინისტრმა 4 აპრილს განაცხადა, რომ აშშ-დან ჩინეთში შესულ ყველა სახის პროდუქციაზე ტარიფები ძალაში 10 აპრილიდან შევა.
ცნობისთვის, ტრამპის მიერ გამოცხადებული ბოლო ტარიფების შედეგად, აშშ-ს მხრიდან ჩინეთის წინააღმდეგ დაწესებულმა ტარიფებმა საშუალოდ 65% შეადგინა, მანამდე უკვე არსებული სავაჭრო ბარიერების გათვალისწინებით. წინა პერიოდში ტრამპს ჩინეთის წინააღმდეგ უკვე გამოცხადებული ჰქონდა 20%-იანი ტარიფი.
გამოცემა Reuters-ის ინფორმაციით, Brent-ის ფიუჩერსები $3.48-ით, იგივე 5%-ით, დაეცა და თბილისის დროით 11:24 საათზე ერთ ბარელზე $66.66-მდე ჩამოვიდა, ხოლო აშშ-ს West Texas Intermediate-ის ფიუჩერსები $3.55-ით, იგივე 5.3%-ით, დაეცა და $63.30-ზე ჩამოვიდა.
აშშ-ს პრეზიდენტმა დონალდ ტრამპმა 2 აპრილს ათეულობით სავაჭრო პარტნიორი სახელმწიფოს წინააღმდეგ "საპასუხო ტარიფები" გამოაცხადა, რის მიზეზადაც მან წლობით არსებული "არასამართლიანი სავაჭრო პრაქტიკები" დაასახელა.
ტრამპის გადაწყვეტილებით, აშშ ყველა სახელმწიფოს, მათ შორის, საქართველოსაც, საბაზისო, 10%-იან ტარიფს დაუწესებს, ხოლო ზოგიერთი მათგანისთვის უფრო მკაცრი ტარიფებია გათვალისწინებული, მათ შორის, დამატებით 34%-იანი ტარიფი ჩინეთზე, 20%-იანი ევროკავშირზე, 46%-იანი ვიეტნამზე და 32%-იანი ტარიფი ტაივანზე.
23 იანვარს აშშ-ს პრეზიდენტმა დონალდ ტრამპმა მსოფლიო ეკონომიკურ ფორუმზე გამოსვლისას საუდის არაბეთსა და OPEC-ს ნავთობის ფასის შემცირების თხოვნით მიმართა და აღნიშნა, რომ ხსენებული სახელმწიფოები ნავთობის მაღალი ფასების გამო უკრაინაში მიმდინარე ომზე არიან პასუხისმგებელი.
- ტრამპი: საუდის არაბეთს ვთხოვ, ნავთობის ფასი შეამცირონ, უკრაინაში ომი მაშინვე დასრულდება
-
ტრამპი: საუდის არაბეთს ვთხოვ, ნავთობის ფასი შეამცირონ, უკრაინაში ომი მაშინვე დასრულდება
ხოლო 25 იანვარს უკრაინაში ტრამპის სპეციალურმა წარმომადგენელმა, კით კელოგმა თქვა, რომ რუსეთ-უკრაინის ომი ნავთობის ფასის დაწევით რუსეთზე ზეწოლით შეიძლება დასრულდეს.
