აშშ-ს პრეზიდენტის, დონალდ ტრამპის თქმით, საუდის არაბეთი და OPEC ნავთობის მაღალი ფასების გამო უკრაინაში მიმდინარე ომზე არიან პასუხისმგებელნი. აშშ-ს პრეზიდენტმა საუდის არაბეთსა და OPEC-ს ნავთობის ფასის შემცირების თხოვნით მიმართა.
ამის შესახებ აშშ-ს პრეზიდენტმა დავოსის მსოფლიო ეკონომიკურ ფორუმზე 23 იანვარს ისაუბრა.
"მე ვთხოვ საუდის არაბეთს და OPEC-ს, შეამცირონ ნავთობის ფასი. თუ ნავთობის ფასი დაეცემა, რუსეთსა და უკრაინას შორის ომი მაშინვე დასრულდება! [...] ისინი [საუდის არაბეთი და OPEC], გარკვეულწილად, ძალიან პასუხისმგებელნი არიან იმაზე, რაც ხდება" - თქვა ტრამპმა.
ტრამპის განცხადებების შემდეგ ნედლი ნავთობის ფასი 1%-ით შემცირდა. ამ მომენტისთვის, ნავთობის ფასი ბარელზე დაახლოებით 80 დოლარია.
ინაუგურაციის შემდეგ დავოსის ეკონომიკურ ფორუმზე ტრამპი ვიდეომიმართვის ფორმატში საერთაშორისო აუდიტორიის წინაშე პირველად წარსდგა.
