21 მარტს, სამხრეთ კორეაში ბუნებრივი მიზეზებით დაწყებულმა ტყის ხანძარმა უკვე 36 000 ჰექტარზე მეტი ტყის საფარი დაწვა. ეს ქვეყნის ისტორიაში ყველაზე მასშტაბური ხანძარია. ჩრდილოეთ გიონგსანგის სამხრეთ-აღმოსავლეთ პროვინციაში 37 000-მდე ადამიანის ევაკუაცია გახდა საჭირო და სულ მცირე 26 ადამიანი დაიღუპა.
საგანგებო სიტუაციებისა და უსაფრთხოების დეპარტამენტის უფროსმა, ლი ჰან-კიუნგმა აღნიშნა, რომ განსაკუთრებით მშრალმა ამინდმა და ძლიერმა ქარმა ცეცხლის გავრცელება გაამწვავა.
"ეს ტყის ხანძარი კიდევ ერთხელ გვაჩვენებს კლიმატური კრიზისის სასტიკ რეალობას, რომელიც აქამდე არ გვქონია" - თქვა ლიმ
"ჩვენ კრიტიკულ მდგომარეობაში ვართ, რადგან ტყის ხანძრების უპრეცედენტოდ სწრაფმა გავრცელებამ მრავალი მსხვერპლი გამოიწვია" - თქვა პრეზიდენტის მოვალეობის შემსრულებელმა ჰან დუკ-სუმ.
მთავრობის საგანგებო სიტუაციების მართვის შტაბის განცხადებით, 22 მარტს, დილით, ხელისუფლებამ ხანძრის წინააღმდეგ საბრძოლველად 9 000-ზე მეტი ადამიანი და დაახლოებით 120 ვერტმფრენი გააგზავნა. ასევე, კორეის საჰაერო ძალებმა სამაშველო ოპერაციებში მონაწილე ვერტმფრენებისთვის საავიაციო საწვავის სამხედრო რეზერვები გახსნა.
ხანძარმა საფრთხე შეუქმნა იუნესკოს ორი მსოფლიო მემკვიდრეობის ძეგლს – ჰაჰოეს სოფელსა და ბიონგსანის კონფუციანურ აკადემიას ანდონგის ქალაქში. ოფიციალური პირის თქმით, ხელისუფლება ცეცხლის შემაკავებელი ქიმიკატების გამოყენებით ცდილობდა მათ დაცვას.
