დღეს ოკუპირებული აფხაზეთი ე.წ. გამარჯვებისა და დამოუკიდებლობის დღეს აღნიშნავს. რუსეთის პრეზიდენტმა, ვლადიმირ პუტინმა საქართველოს ოკუპირებული რეგიონის დე ფაქტო პრეზიდენტს, ასლან ბჟანიას თბილი მილოცვა გადასცა და დაამატა, რომ რუსეთი აფხაზეთის ე.წ. ხელისუფლებისა და მოსახლეობის მხარდაჭერას "სახელმწიფო განვითარების საკითხებში" აქტიურად გააგრძელებს.
"ძვირფასო ასლან გეორგიევიჩ, გთხოვთ, მიიღეთ ჩემი გულწრფელი მილოცვა აფხაზეთის რესპუბლიკის ეროვნულ დღესასწაულთან - გამარჯვებისა და დამოუკიდებლობის დღესთან დაკავშირებით. რუსეთსა და აფხაზეთს შორის ალიანსისა და სტრატეგიული პარტნიორობის პრინციპებზე დაფუძნებული ურთიერთობები წარმატებით ვითარდება. მე მჯერა, რომ ერთობლივი ძალისხმევით ჩვენ შეგვეძლება სხვადასხვა საკითხებში ორმხრივი თანამშრომლობის შემდგომი გაფართოება. რუსეთი გააგრძელებს აფხაზეთის ხელისუფლებისა და მოსახლეობის მხარდაჭერას სახელმწიფო განვითარების საკითხებში", - რუსული სამთავრობო-პროპაგანდისტული გამოცემა TACC-ი ავრცელებს პუტინის მილოცვას.
პუტინი ბჟანიას ჯანმრთელობასა და წარმატებას უსურვებს, ხოლო ოკუპირებული აფხაზეთის მოსახლეობას - მშვიდობასა და კეთილდღეობას.
1993 წლის 27 სექტემბერს სოხუმი დაეცა.
აფხაზეთში საომარი მოქმედებები 1992 წლის 14 აგვისტოს დაიწყო. 1993 წლის 16 სექტემბერს, სეპარატისტებმა 27 ივლისის სამშვიდობო შეთანხმება დაარღვიეს და სოხუმის შტურმი დაიწყეს. შეთანხმების თანახმად, რომლის შესრულების გარანტი რუსეთის ფედერაცია იყო, ქართულმა ძალებმა სოხუმიდან მძიმე ტექნიკა და არტილერია გაიყვანეს. შესაბამისად, შეტევას ქალაქი დაუცველი შეხვდა.
27 სექტემბერს, საქართველოს ძალები იძულებულნი გახდნენ, ქალაქი დაეტოვებინათ. სეპარატისტებმა და მათმა დამხმარე რუსეთის საოკუპაციო ძალებმა შტურმით აიღეს აფხაზეთის მთავრობის შენობა და ტყვედ აიყვანეს მთავრობის წევრები. მათი ნაწილი, მათ შორის მთავრობის თავმჯდომარე ჟიული შარტავა დახვრიტეს.
სოხუმის დაცემის მოლოდინში მშვიდობიანი მოსახლეობის ნაწილმა ქალაქი საზღვაო გზით დატოვა, ძირითადი ნაწილი კი კოდორის ხეობის მიმართულებით დაიძრა, სადაც ასეულობით დევნილი სიცივითა და შიმშილით დაიღუპა.
სეპარატისტებმა აფხაზეთის მთელ ტერიტორიაზე კონტროლი 30 სექტემბერს დაამყარეს.
ოფიციალური მონაცემებით, აფხაზეთის ომში 5 738 მშვიდობიანი ქართველი დაიღუპა, მათ შორის 800 ქალი და 50 ბავშვი. 300 000-მდე ქართველი იძულებული გახდა, საკუთარი სახლიდან გამოქცეულიყო. იმის გამო, რომ საქართველოს სახელმწიფო უწყებებს მონაცემების შესაგროვებლად უკიდურესად შეზღუდული რესურსი ჰქონდათ, სავარაუდოდ, დაღუპულთა ზუსტი რაოდენობა ოფიციალურ რიცხვებს მნიშვნელოვნად აღემატება.
დოკუმენტური ფილმი „დავიწყებული მსხვერპლი: ბუჩამდე იყო აფხაზეთი“ 1992-1993 წლებში აფხაზეთში რუსეთის მიერ ქართველების წინააღმდეგ ორგანიზებული გენოციდის მტკიცებულებებს და დევნილთა ისტორიებს შეეხება.
საფრანგეთის პარლამენტში დაგეგმილი ღონისძიება ნაწილია კამპანიისა ბუჩამდე იყო აფხაზეთი, რომელიც თითქმის სამი წელია მიმდინარეობს აფხაზთა კრების, თავისუფლების ინსტიტუტის, ტაბულასა და პარტია ფედერალისტების ორგანიზებით. კამპანიის მიზანია, გაფართოვდეს საერთაშორისო და შიდა კონსენსუსი რუსეთის მიერ აფხაზეთში ჩადენილი დანაშაულების შესახებ, რომელთა ხასიათი და მასშტაბი გენოციდს უტოლდება.
