სუსმა გამოკითხვაზე რუსეთ-საქართველოს ომის ვეტერანი, უკრაინაში მებრძოლი ქართველი და ფოთის საკრებულოში ნაციონალური მოძრაობის წევრი, ლაშა რუხაია დაიბარა. როგორც რუხაია ამბობს, უწყება სახლში მიუტანეს და ის სასამართლოში, თითქოს, სახელმწიფო გადატრიალებისა და ბიძინა ივანიშვილის მკვლელობის მომზადების საქმეებზე დაიკითხება.
"თითქოს, სახელმწიფო გადატრიალების მუხლია და პლუს, თითქოსდა, ბიძინა ივანიშვილის ლიკვიდაციასთან დაკავშირებით რაღაც ზღაპრები. ხვალ, 25 ივლისს, მაგისტრი მოსამართლის წინაშე დამკითხავენ". - თქვა რუხაიამ ფორმულას ეთერში.
ომის ვეტერანი ამბობს, რომ ხელისუფლებას ქართველი პატრიოტების დასჯა სურს, რადგან ისინი პუტინის დავალებებს ასრულებენ.
"თითქოს რომ ივანიშვილს ვინმე სიკვდილით ემუქრება, ეს ყველაფერი იმის მანიშნებელია, რომ პუტინის ხელის ბიჭები არიან და ბიძინა ივანიშვილსა და მის გუნდს დავარდნილი რეიტინგი რომ აქვთ, აი, ამისთვის სჭირდებათ ქართველი პატრიოტები რომ დასაჯონ, ეს სურთ, მაგრამ არ გამოუვათ. ჩვენ შიშველი ხელებით ვიბრძვით და თუ გადატრიალებას ვაპირებთ, გადავატრიალებთ რუსეთს, ბოროტ რუსულ იმპერიას". - ამბობს რუხაია.
სახელმწიფო უსაფრთხოების სამსახურის ცნობით, მიმდინარეობს გამოძიება ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე.
"სახელმწიფო უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით, საქართველოში დანაშაულებრივი ქმედებების, მათ შორის, პარტია ქართული ოცნების საპატიო თავმჯდომარის, ბიძინა ივანიშვილის მკვლელობის მომზადების ფაქტებს.
ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა". - წერია სუს-ის განცხადებაში.
გამოძიება მიმდინარეობს საქართველოს სსკ-ის 18-323-ე მუხლის პირველი ნაწილით და 315-ე მუხლის პირველი ნაწილით, რაც 10-დან 15 წლამდე თავისუფლების აღკვეთას ითვალისწიმებს.
ბოლო რამდენიმე დღეა, სახელმწიფო უსაფრთხოების სამსახური უკრაინაში მებრძოლ ქართველებსა და ომის ვეტერანებს გამოკითხვაზე იბარებს. გამოკითხულთა შორის ქართული ლეგიონის უკრაინაში მებრძოლი წევრი ნადიმ ხმალაძე, ანტისაოკუპაციო მოძრაობის აქტივისტი ლაშა ჭიღლაძე და ომის ვეტერანები, ბესო ბენდელიანი, ლაშა რუხაია, ვაჟა ცეცაძე, გელა კახაბრიშვილი და კონსტანტინე ჯღამაია არიან.
