აშშ-ს პრეზიდენტმა, ჯო ბაიდენმა იორდანიაში ამერიკელი სამხედროების დაღუპვასთან დაკავშირებით გავრცელებულ განცხადებაში დადო პირობა, რომ ყველა, ვინც ამ თავდასხმაში იყო ჩართული, პასუხს აგებს.
"სამი ამერიკელი სამხედრო მოსამსახურე, რომელბიც დავკარგეთ, იყვნენ პატრიოტები, ამ სიტყვის სრული მნიშვნელობით. მათ მიერ გაღებული უდიდესი მსხვერპლი ჩვენს ერს არასდროს დაავიწყდება. ჩვენ, ყველას ერთად, გვაქვს წმინდა ვალდებულება მათი ოჯახების მიმართ. ჩვენ ვეცდებით ვიყოთ მათი ღირსებისა და სიმამაცის ღირსი. გავაგრძელებთ მათ მონდომებას ტერორიზმთან ბრძოლაში და ეჭვი არ შეგეპაროთ, ყველას ვაგებინებთ პასუხს ჩვენს მიერ შერჩეულ დროსა და გზებით". – თქვა ბაიდენმა განცხადებაში.
ამას გარდა, თავდაცვის მდივანმა, ლოიდ ოსტინმა აღნიშნა, რომ ამერიკულ ძალებზე თავდასხმებს არ მოითმენენ.
"მე და პრეზიდენტი არ მოვითმენთ ამერიკულ ძალებზე თავდასხმებს და მივიღებთ ყველა საჭირო ზომას აშშ-ს, ჩვენი ძალებისა და ჩვენი ინტერესების დასაცავად". – თქვა აშშ-ს უწყების მეთაურმა.
ჯო ბაიდენიც და ლოიდ ოსტინიც ამბობენ, რომ თავდასხმის უკან ირანის მიერ მხარდაჭერილი ჯგუფები დგანან. თავად თეირანი ამ ბრალდებას უარყოფს.
28 იანვარს, ჩრდილოეთ იორდანიაში, სირიის საზღვართან ახლოს დრონებით მიტანილ თავდასხმას 3 ამერიკელი სამხედრო ემსხვერპლა. დაჭრილია სულ მცირე 34 ჯარისკაცი. Reuters-ის წყაროები ამბობენ, რომ აფეთქებები მოხდა გამთენიისას, ყაზარმების მიმდებარედ.
ჰამასის მიერ 7 ოქტომბერს ისრაელზე მიტანილი თავდასხმის შემდეგ ახლო აღმოსავლეთში ვითარება გამწვავდა. გააქტიურდნენ ირანის მიერ მხარდაჭერილი ჯგუფები, რომლებიც აშშ-ს ძალებს სირიასა და ერაყში რეგულარულად ესხმიან თავს. პარალელურად წითელ ზღვაში სავაჭრო ხომალდებს თავს ესხმიან იემენელი ჰუსიტები, რასაც აშშ და დიდი ბრიტანეთი დარტყმებით პასუხობს.
გასულ კვირაში, 24 იანვარს აშშ-მ საპასუხო იერიში მიიტანა ირანის მიერ მხარდაჭერილ შიიტურ დაჯგუფება კათაიბ ჰეზბოლასა და სხვა პროირანული ძალების სამიზნეებზე. აქამდე, 20 იანვარს ირანის მიერ მხარდაჭერილმა დაჯგუფებებმა ამერიკულ ბაზაზე თავდასასხმელად ბალისტიკური რაკეტები გამოიყენეს.
