რაც შეეხება 3+3-ს, აქ გვაქვს ცალსახად ჩამოყალიბებული ძალიან მკაფიო პოზიცია. ვიდრე არ მოხდება საქართველოს ოკუპირებული ტერიტორიების დეოკუპაცია რუსეთის მხრიდან და რუსეთი არ აღიარებს საქართველოს ტერიტორიულ მთლიანობას, მანამდე ჩვენ ამ ფორმატში მონაწილეობას არ მივიღებთ, მაგრამ ეს არ ნიშნავს იმას, რომ ჩვენ არ განვავითარებთ ორმხრივ ურთიერთობებს თურქეთთან, არ შევეცდებით, სამმხრივი ურთიერთობების ფორმატი ჩამოვაყალიბოთ საქართველო-სომხეთი-აზერბაიჯანის მონაწილეობით. რა თქმა უნდა, ჩვენთვის მნიშვნელოვანია, რომ კავკასიაში შექმნილი იყოს ისეთი ამინდი, რაც ხელს შეუწყობს, როგორც პოლიტიკურ, ასევე ეკონომიკურ თანამშრომლობას. ამ ე.წ ფორმატის ერთი ქვეყანა როდესაც უხეშად არღვევს ჩვენი ქვეყნის ტერიტორიულ მთლიანობას და ოკუპირებული აქვს ჩვენი ქვეყნის ნაწილი, რა თქმა უნდა, იმ ფორმატში მონაწილეობას აზრი ეკარგება...
ეს ფორმატი ჩვენი ტერიტორიების დეოკუპაციისთვის არ გამოგვადგება... ჩვენთვის 3+3 სწორედ რუსეთის გამო არის მიუღებელი ფორმატი, მაგრამ ეს არ ნიშნავს, რომ ჩვენ ვეთიშებით შიდა კავკასიურ პროცესებს. გვინდა თბილისი იყოს ადგილი, სადაც დიდი სამშვიდობო ხელშეკრულება დაიდება.
