რუსეთის საგარეო საქმეთა მინისტრის, სერგეი ლავროვის თქმით, იმ შემთხვევაში, თუ G20-ის სამიტის საბოლოო დეკლარაციაში უკრაინასა და სხვა საკითხებზე მოსკოვის პოზიცია არ აისახება, რუსეთი დოკუმენტს დაბლოკავს.
"არ იქნება ზოგადი განცხადება ყველა წევრის სახელით, თუ ჩვენი პოზიცია არ აისახება". - უთხრა ლავროვმა მოსკოვის საერთაშორისო ურთიერთობების სახელმწიფო ინსტიტუტის სტუდენტებს.
მან დასავლეთი საკუთარი დღის წესრიგის გასატარებლად საერთაშორისო ინსტიტუტებისთვის ძირის გამოთხრაში დაადანაშაულა და თქვა, რომ თუ G20-ის ქვეყნები კონსენსუსს ვერ მიაღწევენ, შესაძლოა, სამიტის ბოლოს არასავალდებულო კომუნიკე გამოქვეყნდეს.
"კიდევ ერთი ვარიანტი არის დოკუმენტის მიღება, რომელიც G20-ის კომპეტენციების სფეროებში მიღებულ გადაწყვეტილებებზე იქნება ფოკუსირებული და დანარჩენი ყველამ თავისი სახელით თქვას". - დასძინა ლავროვმა.
G20-ის სამიტი, რომელსაც წელს ინდოეთი უმასპინძლებს, 9 და 10 სექტემბერს გაიმართება. ღონისძიებაზე რუსეთის პრეზიდენტი, ვლადიმირ პუტინი, რომელსაც ჰააგის სასამართლოს მიერ მის წინააღმდეგ დაკავების ორდერის გაცემის შემდეგ ქვეყანა არ დაუტოვებია, არ დაესწრება და მის მაგივრად ნიუ-დელიში სერგეი ლავროვი ჩავა.
