სპეციალური საგამოძიებო სამსახურის ინფორმაციით, საგარეჯოში ჟურნალისტისათვის პროფესიულ საქმიანობაში უკანონოდ ხელის შეშლის და ძალადობის ფაქტებზე ერთი ადამიანი - მ.შ. დააკავეს.
გამოძიების ინფორმაციით, დაკავებულმა საგარეჯოში ფორმულას ოპერატორს ფიზიკური შეურაცხყოფა მიაყენა, ასევე, მთავარი არხისა და რუსთავი 2-ის ჟურნალისტებს სიუჟეტის ჩაწერის საშუალება არ მისცა.
განცხადების მიხედვით, სპეციალური საგამოძიებო სამსახურის თანამშრომლებმა მ.შ. საქართველოს სისხლის სამართლის კოდექსის 154-ე და 126-ე მუხლებით გათვალისწინებული დანაშაულის ჩადენისთვის დააკავეს, რაც ძალადობასა და ჟურნალისტისთვის პროფესიულ საქმიანობაში ხელის შეშლას გულისხმობს.
6 ივლისს საგარეჯოში ერთიანი ნაციონალური მოძრაობის წევრებსა და მხარდამჭერებს სიტყვიერად და ფიზიკურად დაუპირისპირდნენ, ასევე, იძალადეს მედიის წარმომადგენლებზეც. ადამიანთა ჯგუფმა მათი მიმართულებით ქვები და ბოთლებიც ისროლა. ენმ-ის წარმომადგენლები საგარეჯოში პენსიონერებთან შესახვედრად იმყოფებოდნენ. პარტიის წევრების თქმით, ეს ადამიანები ადგილზე ქართულის ოცნების ორგანიზებით შეიკრიბნენ. ენმ-ს ცნობით, აგრესიულად განწყობილ მოქალაქეებს შორის იყვნენ საჯარო მოხელეებიც.
