კანადაში გავრცელებული მასშტაბური ხანძრის გამო ამერიკაში ჰაერი სახიფათოდ დაბინძურდა.
ნიუ-იორკის მერმა, ერიკ ადამსმა მოსახლეობას სახლში დარჩენისკენ მოუწოდა. მერის თქმით, ნიუ-იორკში ეს არის უპრეცედენტო მოვლენა და მოსახლეობამ სიფრთხილე უნდა გამოიჩინოს.
ნიუ-იორკმა ჰაერის ხარისხის ინდექსში (AQI) საგანგაშო 413-ს მიაღწია. AQI მიუთითებს, თუ რამდენად სუფთა ან დაბინძურებულია ჰაერი გარემოში. ინდექსი 0-დან 500-მდე მერყეობს და რაც უფრო მაღალია ეს რიცხვი, მით უარესია ადამიანის ჯანმრთელობისთვის.
ინდექსში 151-დან 200-მდე მაჩვენებელი "არაჯანსაღად" ითვლება. როდესაც ეს რიცხვი 201-დან 300-მდეა, გარემო "ძალიან არაჯანსაღია" და რისკი ყველასთვის იზრდება.
უმაღლესი დონე "საშიშია" და ეს მაშინ ხდება, როდესაც AQI 301-ზე მეტს აღწევს.
AQI დონეები აშშ-ს აღმოსავლეთ სანაპიროს რამდენიმე ქალაქში ადგილობრივი დროით 17:00 საათისთვის შემდეგნაირად გამოიყურება:
- ნიუ-იორკი - 413
- ბუფალო - 179
- ვაშინგტონი - 180
- ატლანტა - 122