შვედეთის საგარეო საქმეთა სამინისტრომ სტოკჰოლმში რუსეთის ელჩი გამოიძახა. რუსი დიპლომატის საგარეო სამინისტროში დაბარების მიზეზი NATO-ში შვედეთის გაწევრიანების შესახებ მისი რეპლიკა გახდა.
"საგარეო საქმეთა სამინისტრო იბარებს რუსეთის ელჩს, რათა გააპროტესტოს ჩარევის აშკარა მცდელობა". - თქვა ქვეყნის საგარეო საქმეთა მინისტრმა ტობიას ბილსტრომმა შვედურ მედიასთან საუბრისას.
რუსეთის ელჩმა საელჩოს ვებგვერდზე გამოქვეყნებულ განცხადებაში აღნიშნა, რომ NATO-ში გაწევრიანებამ სკანდინავიური ქვეყნები "რუსეთის საპასუხო ზომებისთვის, მათ შორის სამხედრო ხასიათის, ლეგიტიმური სამიზნე გახადა".
შვედეთი და ფინეთი NATO-ში გაწევრიანებას 2022 წლიდან ცდილობენ, მას შემდეგ, რაც რუსეთი უკრაინაში შეიჭრა და იმედოვნებენ, რომ გაწევრიანების პროცესი წელს დასრულდება.
