საფრანგეთის პრეზიდენტის, ემანუელ მაკრონის თქმით, მზად არის, ცეცხლის შეწყვეტის შეთანხმების მისაღწევად რუსეთსა და უკრაინას შორის შუამავლის როლი შეასრულოს.
"ვფიქრობ, ჩემი პასუხისმგებლობაა დავთანხმდე ასეთი ინიციატივებს, როდესაც მათ უკრაინა მოითხოვს, რათა დაგმობის, სანქცირებისა და გადაწყვეტილებების მიღების პროცესში ეს ფანჯარა ღია დარჩეს. პირობების შესაძლო დაკმაყოფილების შემთხვევაში ჩვენ შეგვიძლია მივიღოთ უკრაინაში საომარი მოქმედებების შეწყვეტა". – თქვა მაკრონმა.
ემანუელ მაკრონი პირველი დასავლელი ლიდერი იყო, რომელიც რუსეთის პრეზიდენტს, ვლადიმირ პუტინს უკრაინაში ომის დაწყების შემდეგ ესაუბრა. მაკრონმა აღნიშნა, რომ დიდ წარმატებას ვერ მიაღწია, "რადგან რუსეთის პრეზიდენტმა ომი არჩია".
მაკრონმა პუტინი ორპირობაში დაადანაშაულა, რადგან, მისი თქმით, სამხედრო მოქმედებების დაწყებამდე რამდენიმე საათით ადრე ის და სხვა ევროპელი ლიდერები რუსეთის პრეზიდენტთან მინსკის შეთანხმებების შესრულების დეტალებს განიხილავდნენ.
რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის კიევის დაბომბვით დაიწყო. ქალაქების დაბომბვამდე სულ რაღაც 20 წუთით ადრე რუსეთის პრეზიდენტმა, ვლადიმირ პუტინმა უკრაინას ომი ვიდეომიმართვით ოფიციალურად გამოუცხადა.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ "უკრაინული აგრესიის" მოგერიებაში.
ომის გამოცხადებამდე უკრაინის პრეზიდენტმა, ვოლოდიმირ ზელენსკიმ პუტინთან დაკავშირება სცადა, თუმცა, მისივე ცნობით, პასუხად მხოლოდ სიჩუმე მიიღო.
რუსეთის სამხედრო ძალები უკრაინას სხვადასხვა მიმართულებით უტევენ.
