11 სექტემბერს, 9/11-ის ტერაქტებიდან 20 წლის თავზე გავრცელდა ერთსაათიანი ვიდეო, რომელშიც ალ-კაიდას ლიდერი აიმან ალ-ზავაჰირი ჩანს. დაზუსტებული არაა არის თუ არა ვიდეოჩანაწერი ახალი. აქამდე გავრცელდა ხმები, რომ ალ-ზავაჰირი მკვდარი იყო.
ალ-ზავაჰირი ჩანაწერში ამბობს, რომ "იერუსალიმი არასდროს იქნება იუდაიზირებული" (ანუ ებრაელთა ბატონობის ქვეშ), ასევე, პატივი მიაგო ალ-კაიდას ტერაქტებს, მათ შორის იანვარში, სირიაში რუსეთის სამხედროებზე განხორვიელებულ თავდასხმას. მან ახსენა აშშ-ს მიერ ავღანეთის 20-წლიანი კონფლიქტის შემდეგ დატოვებას.
ამერიკული არასამთავრობო ორგანიზაცია SITE-ის დაზვერვის ჯგუფის თქმით, ვიდეო შესაძლოა არ იყოს ახალი ჩაწერილი. ამერიკის მიერ ავღანეთის დატოვება ჯერ კიდევ 2020 წელს გადაწყდა, ვიდეომიმართვაში კი ალ-ზავაჰირი არაფერს ამბობს ისეთ მნიშვნელოვან ფაქტზე, როგორიცაა თალიბანის მიერ ქაბულის დაკავება.
მიუხედავად ამისა, ვიდეოში ნახსენებ დეტალებზე დაყრდნობით, შეიძლება ითქვას, რომ ის პირველი იანვრის შემდეგ არის ჩაწერილი. 1-ელ იანვარს ალ-კაიდას ტერაქტის სამიზნეები გახდნენ რუსი სამხედროები ჩრდილოეთ სირიაში, ქალაქ რაქაში. ალ-ზავაჰირი სწორედ ამ ფაქტს ახსენებს და ადიდებს.
2020 წლის მეორე ნახევარში გავრცელდა ხმები, რომ ალ-ზავაჰირი ავადმყოფობის შედეგად მოკვდა. ამის შემდეგ მისი სიცოცხლის დაბადასტურებელი არანაირი მასალა აქამდე არ გავრცელებულა.
"ის შეიძლება მკვდარია, თუმცა, თუ ასეა, 2021 წლის იანვარში ან იანვრის შემდეგ შეიძლება მომკვდარიყო", – წერს SITE-ის დირექტორი, რიტა კაცი Twitter-ზე.
ეგვიპტელი ალ-ზავაჰირი ალ-კაიდას ლიდერი მას შემდეგ გახდა, რაც 2011 წელს დაჯგუფების წინა ლიდერი, ოსამა ბინ ლადენი ამერიკულმა ძალებმა პაკისტანში, აბოტაბადში მოკლეს. 2001 წლის 11 სექტემბრის ტერაქტის უკან სწორედ ალ-კაიდა იდგა.