თბილისში, ივანე ბოკერიას სახელობის კლინიკაში კორონავირუსით 47 წლის მელოგინე გარდაიცვალა. ინფორმაცია ტაბულას კლინიკურმა დირექტორმა, ალექსი ვაჩაიძემ დაუდასტურა.
როგორც ის ამბობს, ქალი კლინიკაში ქუთაისიდან საკეისრო კვეთის ჩატარების შემდეგ შეიყვანეს - ის ჟანგბადზე სრულად იყო დამოკიდებული და სუნთქვის მწვავე უკმარისობა ჰქონდა. ვაჩაიძის ინფორმაციით, 47 წლის მელოგინე ჯერ რეანიმაციაში, შემდეგ კი, ერთი კვირის წინ, მექანიკურ ვენტილაციაზე გადაიყვანეს. ქალი გუშინ, 1-ელ სექტემბერს გარდაიცვალა.
27 აგვისტოს ბოკერიას კლინიკაში 19 წლის ინფიცირებული პაციენტი მშობიარობის შემდეგ გარდაიცვალა. 25 აგვისტოს მშობიარობიდან მე-3 დღეს 26 წლის ქალი COVID-19-ით გარდაიცვალა. 18 აგვისტოს COVID-19-ს 7 თვის ორსულის სიცოცხლე ემსხვერპლა, 19 აგვისტოს კი მელოგინე ქალის - მას კორონავირუსი 8 თვის ორსულს დაუდასტურდა.
2 სექტემბრის მონაცემებით, საქართველოში კორონავირუსით კიდევ 81 ადამიანი გარდაიცვალა, დადასტურდა ინფიცირების 3 212 ახალი შემთხვევა. პანდემიის დაწყებიდან დღემდე საქართველოში ოფიციალურად დადასტურებულია კორონავირუსით ინფიცირების 556 909 შემთხვევა, მათგან 502 534 ადამიანი გამოჯანმრთელდა, 7 563 კი გარდაიცვალა. ქვეყანაში ინფიცირების 46 786 აქტიური შემთხვევაა.
ასაცრელად დარეგისტრირდით – booking.moh.gov.ge-ზე ან რეგისტრაციისთვის დარეკეთ:
- ჯანდაცვის სამინისტროს ცხელ ხაზზე – 15 22;
- ევროპული საქართველოს ცხელ ხაზზე – 0322 800 222;
- დროას ცხელი ხაზზე – 599 192 277; 598 642 956;
- ლელოს ცხელ ხაზზე – 0322 232 288;
- ენმ-ს ცხელ ხაზზე – 599 85 25 46;
- იუსტიციის სახლების სატელეფონო ცენტრში – 0322 405 405.
სად და რომელი ვაქცინებით შეძლებთ აცრას წინასწარი რეგისტრაციის გარეშე – სია.
