ჟურნალისტებზე ძალადობა

ბოკერია წულუკიანზე: ივანიშვილის რეჟიმის სახეა, უმძიმესად გამოიყურებოდა

"უმძიმესად გამოიყურებოდა. ქვეყანას ასეთი პოლიტიკოსი რომ ჰყავს, თუ მას გავლენა აქვს, უკვე კატასტროფაა". - ამბობს ევროპული საქართველოს თავმჯდომარე, გიგა ბოკერია კულტურის, სპორტისა და ახალგაზრდობის მინისტრ თეა წულუკიანის შესახებ.  

"წულუკიანი ღარიბაშვილთან, კობახიძესთან, მორგოშიასა და ფალავანდიშვილთან ერთად ივანიშვილის რეჟიმის სახეა. თუ გვინდა, რომ სიძულვილის, უტიფრობის, არა მხოლოდ მედიის, საზოგადოების მიმართ კატასტროფული უპატივცემულობის და, მათ შორის, თავისუფალი მედიის მიმართ განსაკუთრებული სიძულვილის გალერეა გავაკეთოთ, იქ წულუკიანი განსაკუთრებულ ადგილს დაიკავებს ამ გვარებთან ერთად. 

ამიტომ ხელისუფლების შეცვლის გარეშე ეს პრობლემა ვერ მოგვარდება. მისი სახე გუშინ უმძიმესად გამოიყურებოდა, ქვეყანას ასეთი მინისტრი არ შეიძლება ჰყავდეს კი არა, ასეთი პოლიტიკოსი რომ ჰყავს, თუ მას რამე გავლენა აქვს, უკვე კატასტროფაა". - ამბობს გიგა ბოკერია. 

22 ივლისს თეა წულუკიანმა მთავარი არხის ჟურნალისტს მიკროფონი წაართვა და არ დაუბრუნა. ჟურნალისტ, ემა გოგოხიას ინფორმაციით, ადგილზე გამოძახებულმა საპატრულო პოლიციის თანამშრომლებმა უთხრეს, რომ თეა წულუკიანს, რომელმაც მიკროფონი წაართვა, ვერ მიუახლოვდებიან. წულუკიანი ამბობს, რომ მიკროფონს მაშინ დააბრუნებს, როცა "როცა ესენი 3 ოქტომბერს ჩაიყრებიან იქ, სადაც მათი ადგილია".

მთავარი არხის გენერალური დირექტორი, ნიკა გვარამია აცხადებს, რომ კულტურის მინისტრის, თეა წულუკიანის წინააღმდეგ პროკურატურას მიმართავს. მისი თქმით, ჟურნალისტისთვის მიკროფონის წართმევა სისხლის სამართლის დანაშაულის ნიშნებს შეიცავს. 

კომენტარები