პოლიტიკური კრიზისი

ჯაფარიძე: პარლამენტში მუშაობას შევუდგებით, როდესაც მელია და რურუა იქნებიან გარეთ

ლელო

"როდესაც იქნება ორი ადამიანი გარეთ ჩვენ, რა თქმა უნდა, პარლამენტში მუშაობას შევუდგებით, მაგრამ შესაძლებელია, თუ ამნისტიის კანონამდე ვერ გათავისუფლდა ეს ხალხი, მაშინ ალბათ ამნისტიის კანონს უნდა დავუჭიროთ მხარი, რომ ეს ხალხი გამოვიდეს გარეთ". – ამის შესახებ ლელოს ერთ-ერთმა ლიდერმა, ბადრი ჯაფარიძემ პარლამენტში ევროპული საბჭოს პრეზიდენტთან შარლ მიშელთან შეხვედრის შემდეგ ისაუბრა.

ჯაფარიძის თქმით, უნდა მოიძებნოს რაიმე გზა, რომ პოლიტპატიმრები ნიკა მელია და გიორგი რურუა, რაც შეიძლება მალე გათავისუფლდნენ, რის შედეგადაც იქნება შესაძლებელი ლელოს საპარლამენტო საქმიანობაში მონაწილეობის მიღება.

"მელიას თანხმობის გარეშე ძალით გირაოს არავინ გადაიხდის, შესაბამისად უნდა მოიძებნოს ამ შეთანხმების სულისკვეთებიდან გამომდინარე, ისეთი გადაწყვეტილება, რომელზეც არ შეიქმნება წინააღმდეგობა.  რაც უფრო სწრაფად გამოვლენ ეს ადამიანები გარეთ და ჩვენ ვუთხარით ბატონ მიშელს, მით უფრო სწრაფად შევძლებთ ჩვენ ჩავერთოთ საპარლამენტო მუშაობაში და მე მინდა მოვუწოდო ქართულ ოცნებას, რომ პასუხისმგებლობით მიუდგეს ამ საკითხს, იმ თვალსაზრისით, რომ ეს დეესკალაცია და კრიზისის განმუხტვა ჩვენ ქვეყანას სჭირდება და რაღაც სიჯიუტის გამო, ნუ შექმნიან ისეთ წინააღმდეგობას, რომელიც ხელს შეუშლის ამ ადამიანების დაუყოვნებლივ გათავისუფლებას". – თქვა ჯაფარიძემ

გუშინ, 19 აპრილს, ოპოზიციური პარტიების ნაწილმა და ქართულმა ოცნებამ ევროპული საბჭოს პრეზიდენტ შარლ მიშელის მიერ შემოთავაზებულ შეთანხმებას ხელი მოაწერეს.

შეთანხმების ერთ-ერთი პუნქტი პოლიტიზებული მართლმსაჯულებაა, რომლის თანახმადაც ხელმომწერებმა ვალდებულება უნდა აიღონ, ხელშეკრულების გაფორმებიდან ერთი კვირის განმავლობაში განიხილონ პოლიტიზებული მართლმსაჯულების ორი შემთხვევა, ამნისტიით ან/და ისეთი ნაბიჯებით, რომ მისი ეკვივალენტური შედეგი გამოიღოს. პარლამენტში წარმოდგენილმა პარტიამ უნდა მოახდინოს ინიცირება კანონისა ამნისტიის შესახებ, რომელიც 2019 წლის 19-21 ივნისის პროტესტებთან დაკავშირებულ ყველა დარღვევასა და დაკავებას შეეხება.

ოპოზიციური პარტიებიდან ხელი მოაწერეს ლელომ (ბადრი ჯაფარიძე, მამუკა ხაზარაძე), სტრატეგია აღმაშენებელმა (გიორგი ვაშაძე), გირჩმა (ვახტანგ მეგრელიშვილი), გირჩი-მეტი თავისუფლებამ (ზურაბ ჯაფარიძე), მოქალაქეებმა (ალეკო ელისაშვილი), რესპუბლიკურმა პარტიამ (ხათუნა სამნიძე), ასევე, ინდივიდუალურად მოაწერეს ხელი არჩეულმა დეპუტატმა დავით ბაქრაძემ და ენმ-ის წევრმა სალომე სამადაშვილმა და ყოფილმა თავმჯდომარემ, გრიგოლ ვაშაძემ. დღეს, 20 აპრილს, დოკუმენტს ხელი მოაწერა ევროპული საქართველოს სიის წევრმა, არმაზ ახვლედიანმა და შალვა შავგულიძემ.

შეთანხმების დოკუმენტს ხელი ასევე მოაწერეს გიორგი გახარიას გუნდის წევრებმა და ევროპელმა სოციალიტებმა (დავით ზილფიმიანი).

ქართული ოცნებიდან ხელი მოაწერეს არჩილ თალაკვაძემ და შალვა პაპუაშვილმა.

შარლ მიშელის დოკუმენტს ხელი არ მოაწერეს ერთიანმა ნაციონალურმა მოძრაობამ, ევროპულმა საქართველომ და ლეიბორისტულმა პარტიამ. ენმ-ს განცხადებით, მოლაპარაკების სივრცის გასახსნელად აუცილებელია ნიკა მელიას უპირობოდ, გირაოს გარეშე გათავისუფლება.

დოკუმენტს ხელს არ აწერს ევროპული საქართველოს საარჩევნო სიის წევრი ელენე ხოშტარია

ევროპული საქართველოს ლიდერის, გიგა ბოკერიას თქმით კი, "ჩვენს სიტყვას აქვს ფასი, როცა რაღაცას ვამბობთ, იმას ვაკეთებთ". მან აღნიშნა, რომ თვითმმართველობის არჩევნების შედეგებზე ვადამდელი არჩევნების მიბმა არასწორია და ეს საკითხი გამოსასწორებელია. 

კომენტარები