ჯანდაცვის მინისტრის მოადგილე თამარ გაბუნიამ ჩინური სინოფარმის ვაქცინის საქართველოში შემოსვლის შემდეგ განაცხადა, რომ აღნიშნული ვაქცინის გამოყენება აპრილის მეორე ნახევარში იქნება შესაძლებელი, მას შემდეგ, რაც მსოფლიო ჯანდაცვის ორგანიზაციისგან ავტორიზაციას მიიღებს.
"საქართველომ მიიღო 100 000 დოზა სინოფარმის ვაქცინა, რომელიც გახლავთ ჩინური წარმოების და ამ ვაქცინას, დღეის მდგომარეობით, ათეულობით ქვეყანა იყენებს უკვე და 40 მილიონ ადამიანზე მეტი არის ვაქცინირებული სინოფარმით. კვლევები, რომლებიც ვაქცინის თაობაზეა ჩატარებული, ძალიან კარგ შედეგებს უჩვენებს და ჩვენი მოლოდინი არის, რომ აპრილის შუა რიცხვებისთვის ვაქცინა მიიღებს ჯანდაცვის მსოფლიო ორგანიზაციის ავტორიზაციას გადაუდებელი გამოყენებისთვის.
დღეის მდგომარეობით, ვაქცინა ავტორიზებულია მკაცრი მარეგულირებლიდან უნგრეთის წამლის სააგენტოს მიერ, რაც ჩვენი სამართლებრივი ჩარჩოს ფარგლებში სრულად ჯდება და გვაძლევს პასუხისმგებლობის დაზღვევის საშუალებას ვაქცინის გამოყენების შემთხვევაში.
ვაქცინის გამოყენება მოხდება ვაქცინაციის პროგრამის ფარგლებში ისევე, როგორც ხდება სხვა ვაქცინების გამოყენება, ასტრაზენეკასა და ფაიზერზე მაქვს საუბარი. ვაქცინის შენახვას არ სჭირდება განსაკუთრებული პირობები, ვაქცინა ინახება 2-დან 8 გრადუსამდე ტემპერატურაზე, რაც, მოგეხსენებათ, არის რუტინული რეჟიმი იმუნიზაციის პროგრამისთვის და ვაქცინაცია, ვფიქრობთ, რომ აპრილის მეორე ნახევრიდან უკვე ხელმისაწვდომი იქნება ყველა იმ იმუნიზაციის ცენტრში, რომელიც, დღეის მდგომარეობით, ჩართულია პროგრამაში და ეს ვაქცინაც შეურთდება ჩვენი იმუნიზაციის პროგრამის ფარგლებში გამოყენებული სხვა ვაქცინების სიას, რაც მოგვცემს ვაქცინაციის გეგმით განსაზღვრული სამიზნეების მიღწევის საშუალებას". – განაცხადა გაბუნიამ.
საქართველოში ჩინური წარმოების ვაქცინის, სინოფარმის 100 000 დოზა თბილისის აეროპორტში დღეს, 3 აპრილს, სპეცრეისით ჩამოვიდა.
სინოფარმის ვაქცინა მსოფლიო ჯანდაცვის ორგანიზაციის მიერ ჯერ ავტორიზებული არაა, თუმცა ჯანდაცვის მინისტრის მოადგილის, თამარ გაბუნიას თქმით, მათ იმ პირობით შეიძინეს ჩინური ვაქცინა, რომ აპრილის ბოლომდე ავტორიზაციას მიიღებს.
Sinopharm-ის ვაქცინა შექმნა პეკინის ბიოლოგიური პროდუქტების ინსტიტუტმა 2020 წელს. სახელმწიფოს მფლობელობაში არსებული კომპანიის, სინოფარმის ცნობით, კლინიკურ ცდებში ვაქცინა 79%-იან ეფექტიანობას აჩვენებს.
საქართველოში ასტრაზენეკას ვაქცინის 43 200 დოზა 13 მარტს შემოვიდა და 15 მარტიდან ვაქცინაცია დაიწყო. Pfizer-ის 28 200 დოზა კი 25 მარტს შემოვიდა. აქედან აიცრა 8 000-მდე ადამიანი. 25 მარტიდან, სამედიცინო სფეროს წარმომადგენლების გარდა, პორტალზე დარეგისტრირება შეუძლიათ 65 წელს ზემოთ პირებსაც, რომელთაც ექნებათ საშუალება, არჩევანი გააკეთონ Pfizer-სა და AstraZeneca-ს შორის. Pfizer-ით აცრა 30 მარტიდან დაიწო.
