ჭიაბერაშვილი: ტყუილია სერგეენკოს განცხადება, რომ C ჰეპატიტის ელიმინაციის პროგრამის ფარგლებში უკვე 125 000-მა პირმა იმკურნალა
ევროპული საქართველოს დეპუტატის, ზურაბ ჭიაბერაშვილის, თქმით, პარტია შეშფოთებულია ჯანდაცვის მინისტრ დავით სერგეენკოს განცხადებით, რომელმაც 6 მარტს თქვა, რომ 2020 წლისთვის C ჰეპატიტის ელიმინაციის პროგრამის შეწყვეტის რისკი არსებობს.
ჭიაბერაშვილის თქმით, პრობლემა ის არის, რომ 2020 წლისთვის C ჰეპატიტის ელიმინაცია ვერანაირად ვერ მოხდება, როგორც ეს პროგრამის მიზნებშია გაწერილი.
"ძალიან ვუფრთხი C ჰეპატიტის აღმოფხვრის პროგრამის შესახებ რაიმე კრიტიკული შენიშვნის საჯაროდ გამოთქმას, რადგან არ მინდა ასეთი მნიშვნელოვანი და საჭირო პროგრამა რაიმეთი დაზიანდეს, მაგრამ პროგრამის განხორციელების პროცესში უკვე ისეთი პრობლემის წინაშე დადგა ქვეყანა, რომ ახლა გაჩუმებით უფრო დავაზიანებთ ჩვენს საერთო საქმეს,"- ამბობს ჭიაბერაშვილი.
დეპუტატი ამბობს, რომ სერგეენკო იტყუება, როდესაც ამბობს, რომ 125 ადამიანს უკვე უმკურნალეს პროგრამის ფარგლებში და დაახლოებით, 50 000-მდეა დარჩენილი, ვისაც მკურნალობა სჭირდება.
პრესკონფერენციაზე ჭიაბერაშვილმა ჯანდაცვის მინისტრის მოადგილის, მაია ლაგვილავას, 2018 წლის 13 დეკემბრით დათარიღებული წერილი წარმოადგინა, სადაც მისივე თქმით, სრულიად განსხვავებულ და გაცილებით ნაკლებ მონაცემზეა საუბარი. კერძოდ, ჭიაბერაშვილის განცხადებით, ამ წერილის მიხედვით, პროგრამის დაწყებიდან 4 წლის თავზე მკურნალობაში ჩაერთო 51 000-ზე მეტი ადამიანი და ის 48 000-ზე მეტმა პირმა დაასრულა.
ევროპული საქართველოს ცნობით, 2 წლის წინ ჩატარებულმა კვლევამ აჩვენა, რომ საქართველოში C ჰეპატიტით ინფიცირებული დაახლოებით 150 000 ადამიანია. ელიმინაციის პროგრამის დასახული მიზანია, 2020 წლისთვის მინიმუმ 135 000 ადამიანს (ანუ 90%-ს) ჰქონდეს მკურნალობის კურსი გავლილი. პარტიის ინფორმაციით, ლაგვილავას წერილში წერია, რომ პროგრამის დაწყებიდან 2018 წლის დეკემბრამდე სკრინინგის კომპონენტში 123 000-ზე მეტ პირს დაუდგინდა C ჰეპატიტის სავარაუდო არსებობა. ჭიაბერაშვილი ამბობს, რომ სწორედ ამ რიცხვით მანიპულირებს ჯანდაცვის მინისტრი, თუმცა სინამდვილეში, მისივე თქმით, ამ 123 000-დან განმეორებითი, ე.წ კონფირმაციული კვლევა 75 400-მა პირმა ჩაიტარა, ხოლო მათ შორის დაავადება 64 200 პირს დაუდგინდა:
"ამ 64 200-დან სრული დიაგნოსტიკური კვლევა ჩაიტარა 52 400-მა პირმა. ამ 52 400-დან მკურნალობაში ჩაერთო 51 000 და მკურნალობა დაასრულა 48 000-მა პირმა".
ჭიაბერაშვილი ამბობს, რომ თუ 4 წლის განმავლობაში პოტენციურ დაავადებულთაგან მკურნალობა მხოლოდ 40%-მა გაიარა, როგორ მოხერხდება 2020 წლამდე დარჩენილი 70-75 000 პირის პროგრამაში ჩართვა და მკურნალობა.
"დღეს ეს უკვე შეუძლებელი ჩანს. მიზეზებზე ჯანდაცვის სამინისტრომსაჯაროდ უნდა ისაუბროს და საზოგადოებას C ჰეპატიტის ელიმინაციის განახლებული გეგმა უნდა წარუდგინოს. საგანგაშოა, რომ 15,000 ადამიანს ხელთ აქვს ანალიზის პასუხი, რომ აქვს C ჰეპატიტი და მკურნალობის პროცესში არაა ჩართული", - ამბობს ჭიაბერაშვილი.
6 მარტს სააგენტო ინტერპრესნიუსის მიერ გავრცელებულ კომენტარში, დავით სერგეენკომ თქვა, რომ ის ვერ დაადასტურებს, რომ C ჰეპატიტის ელიმინაციის პროგრამა ხისტად შეწყდება, "თუმცა ამის რისკი, ალბათ, არსებობს". სერგეენკო მიზეზად კონტრაქტს ასახელებს, რომლის მიხედვითაც პროგრამის მიზნები 2020 წლამდეა გაწერილი. მისივე თქმით, ფარმაცევტულ კომპანიასთან ხელშეკრულება უფრო ხანგრძლივია, მაგრამ ბევრი რამ იქნება დამოკიდებული იმაზე, რამდენად მეტი ადამიანი ჩაერთვება, რომ 2020 წლისთვის მკაფიო შედეგი იყოს.
მინისტრმა ასევე თქვა, რომ C ჰეპატიტის ელიმინაციის პროგრამის ფარგლებში უკვე 125 000-მა პირმა იმკურნალა და ახლა დაახლოებით 50 000-მდე პირია ისეთი, ვისაც მკურნალობა სჭირდება.
