სატრანსპორტო მოძრაობა

14 აგვისტოდან თბილისის რამდენიმე ქუჩაზე ტრანსპორტის მოძრაობა დროებით შეიზღუდება

თბილისის მერია

14 აგვისტოდან თბილისის რამდენიმე ქუჩაზე ტრანსპორტის მოძრაობა ნაწილობრივ შეიზღუდება. დედაქალაქის მერიის ცნობით, მიზეზი ინფრასტრუქტურული სამუშაოებია.

კერძოდ, ტრანსპორტის მოძრაობა იცვლება კოსტავას ქუჩის მონაკვეთზე - სააკაძის მოედნიდან 26 მაისის მოედნის მიმართულებით, უზნაძისა და ჩიქოვანის (ყოფილი ხილიანი) ქუჩებზე.

საზოგადოებრივი ტრანსპორტი შემდეგი სქემით იმოძრავებს:

ავტობუსები და მიკროავტობუსები სააკაძის მოედნიდან პეკინის გამზირს მიროტაძის ქუჩის ნაცვლად, ჭაბუკიანის (ყოფილი საბურთალოს ქუჩის ნაწილი) ქუჩით დაუკავშირდებიან;

აღმაშენებლის გამზირიდან ჭოროხის ქუჩის გავლით მოძრავი საზოგადოებრივი ტრანსპორტი უზნაძის ქუჩის ნაცვლად, მტკვრის მარცხენა სანაპიროთი ისარგებლებს.

რაც შეეხება N64 მიკროავტობუსს, ის ჩიქოვანის ქუჩის ნაცვლად, მელიტონ და ანდრია ბალანჩივაძეებისა და დოლიძის ქუჩების გავლით იმოძრავებს.

თბილისის მერია შეფერხებისთვის ბოდიშს იხდის.

კომენტარები