აშშ-ის პრეზიდენტიც და ჩრდილოეთ კორეის დიქტატორიც უკვე სინგაპურში იმყოფებიან. ისინი 12 ივნისს პირისპირ მოლაპარაკებებს გამართავენ - ეს აშშ-ისა და ჩრდილოეთ კორეის მმართველის პირველი შეხვედრა იქნება.
კიმ ჩენ ინი სასტუმრო St. Regis-ში დაბინავდა, მას 50-მდე დაცვის წევრი ახლავს. კორეის დიქტატორმა უკვე გამართა შეხვედრა სინგაპურის პრემიერმინისტრ ლი სიან ლუნსთან.
დონალდ ტრამპი კი სინგაპურში კანადაში გამართული დიდი შვიდეულის სამიტიდან ჩაფრინდა, ის სასტუმრო შანგრილაში გაჩერდა. საინტერესოა, რომ ლიდერები სამიტამდე საკმაოდ ადრე ჩავიდნენ სინგაპურში.
აშშ-ს და მის მოკავშირეებს ჩრდილოეთ კორეის მხრიდან ატომური იარაღის სრულად დათმობა სურთ. ტრამპმა რამდენიმე დღის წინ აღნიშნა, რომ ამ მიზნის მისაღწევად სავარაუდოდ, ერთზე მეტი შეხვედრა იქნება საჭირო და თუ ის 12 ივნისის შეხვედრით კმაყოფილი დარჩება, არაა გამორცხული მან კიმ ჩენ ინი აშშ-შიც მიიწვიოს. ტრამპის თქმით, ის კორეასთან მიმართებით ტერმინ "მაქსიმალურ ზეწოლას" აღარ გამოიყენებს, რადგან "მეგობრულ მოლაპარაკებებს" იწყებენ, თუმცა ასევე აღნიშნა, რომ აშშ-ს ჩრდილოეთ კორეის წინააღმდეგ კიდევ ბევრი სანქციის დაწესება შეუძლია.
სინგაპურის აეროპორტში დაფრენის შემდეგ კიმ ჩენ ინი დაჯავშნულ ლიმუზინში ჩაჯდა, მას ესკორტად მორბენალი დაცვის წევრები მიჰყვებოდნენ. სინგაპურში უსაფრთხოების პირობები გამკაცრებულია, გადაკეტილია მთავარი მაგისტრალები. ადამიანის უფლებების ფეხქვეშ გათელვის გამო კიმ ჩენ ინს სინგაპურში საპროტესტო აქციების ფონზე დახვდნენ.
კიმ ჩენ ინი დიპლომატიურ უხერხულობას ჩინეთის სახელმწიფო ავიახაზებმა გადაარჩინა, იმის გამო რომ კორეას არ ჰყავს თვითმფრინავი, რომელიც კორეა-სინგაპირის მანძილს დაფარავდა, დიქტატორმა Air China-ს Boeing 747-ით იფრინა.
