ნიამორები და კეთილშობილი ირმები თბილისის ზოოპარკის ახალ ტერიტორიაზე გადაიყვანეს. თბილისის ზღვის მიმდებარედ განთავსებული ახალი ზოოპარკი 48 ჰექტარ ფართობს იკავებს.
კავკასიის ჩლიქოსნების ვოლიერის მშენებლობა გერმანიის მთავრობამ დააფინანსა. ვოლიერის ფართობი ჰექტარზე მეტია. მის ცენტრში ხელოვნური კლდე დგას.
"სრული შთაბეჭდილება იქმნება, რომ ცხოველები ვოლიერში კი არა, ბუნებაში დასეირნობენ. თან როგორაა, იცით? ხელის გულზე კი არ არიან გამოფენილები ყველას დასანახად, კარგა ხანს უნდა იბოდიალო, რომ თვალი მოჰკრა ხეებსა და ბუჩქებს შორის მიმალულებს. ფოტოებიც ისეთი გამოდის, გულს უხარია. ასე გგონია, ზოოპარკში კი არა, სადღაც, ბუნებაში იღებ" - წერს თბილისის ზოოპარკის Facebook-გვერდის ადმინისტრატორი.
ცხოველების ტრანსპორტირება მათი დაძინებით იწყება. ძილის პერიოდს იყენებენ ცხოველის სრული ვეტშემოწმებისთვის.
"ვუმუშავებთ ჩლიქებს, ვუღებთ სისხლს ანალიზებისთვის და ვნომრავთ. ეს პროცედურები ცხოველების იდენტიფიცირებისა და მათი გენეტიკური მონაცემების შეგროვებისთვისაა საჭირო. თბილისის ზოოპარკი კეთილშობილი ირმებისა და ნიამორების კონსერვაციის პროექტს ახორციელებს, რაც ამ სახეობის ცხოველების გამრავლებასა და შემდგომ ბუნებაში დაბრუნებას გულისხმობს. ამისთვის კი მათი გენეტიკური მონაცემების ცოდნა აუცილებელია.
მოკლედ, დიდი ფაციფუცის შემდეგ, ნიამორები და ირმები წარმატებით დავაბინავეთ ახალ ვოლიერში. თავიდან ცოტა დაიბნენ, ეს სად მოვხვდით, რა დიდებული სამოთხეა, სულ მწვანეა და არც მანქანების ხმა ისმისო. მერე ნელ-ნელა შეეჩვივნენ ახალ გარემოს. დადიან, დაცუცუნობენ და ახრამუნებენ ახალამოწვერილ ბალახს. უხდებიან იქაურობას...
ახლა იმას ვფიქრობთ, რაც შეიძლება მალე მოვაწესრიგოთ იქაური ინფრასტრუქტურა, რომ თქვენც შეძლოთ ამ სილამაზით ტკბობა" - წერია თბილისის ზოოპარკის გვერდზე.
ამ დროისთვის ახალ ზოოპარკში სულ 30 ცხოველია გადაყვანილი. ერთ ვოლიერში ნიამორები და ირმები ბინადრობენ. მეორეში კი, მგლები და დათვები.
