საქსტატის წინასწარი მონაცემებით, 2016 წლის პირველი რვა თვის (იანვარ-აგვისტოს) შუალედში საქართველოს ეკონომიკა წინა წელთან შედარებით 2.7%-ით გაიზარდა. საქსტატის გათვლებით აგვისტოში საქართველოს ეკონომიკურმა ზრდამ 2.9% შეადგინა.
2016 წლის ბიუჯეტით წელს 3%-იანი ეკონომიკური ზრდის მიღწევაა დაგეგმილი. გასულ წელს ზრდა 2.8% იყო 2017 წელს კი მთავრობა 5.5%-იანი ზრდის მიღწევას გეგმავს. ფინანსთა სამინისტროს მიერ გამოქვეყნებული დოკუმენტის "ძირითადი ეკონომიკური და ფინანსური ინდიკატორები 2016-2020 წლებში" მიხედვით, 2017-2020 წლებში ეკონომიკური ზრდის სამიზნე მაჩვენებელი 5.5% იქნება.
უცნობია, შესრულდება თუ არა ამ დოკუმენტით განსაზღვრული პროგნოზები, რადგანაც ქართული ოცნების მთავრობის ეკონომიკური პროგნოზები ხშირად არ მართლდება. მაგალითად, 2013 წლის ბიუჯეტით 6%-იანი ზრდის მიღწევა იყო დაგეგმილი, თუმცა რეალურად 3.3% შეადგინა. 2014 წელს მთავრობამ საპროგნოზო მაჩვენებლად 5% აიღო, ზრდამ კი 4.6% შეადგინა. 2015 წელს კი ,თავდაპირველად ზრდის პროგნოზი 5%-ს შეადგენდა, რის მიღწევაზეც მთავრობამ უარი თქვა. 2015 წლის კორექტირებული ბიუჯეტით სამიზნე ზრდად 2% განისაზღვრა, რეალურმა ზრდამ კი ამაზე 0.8%-ით მეტი შეადგინა.
საქსტატმა 19 სექტემბერს სექტორების მიხედვით ეკონომიკური ზრდის მაჩვენებლები გამოაქვეყნა, რომლის მიხედვითაც 2016 წლის მეორე კვარტალში ყველაზე მაღალი ტემპით სამთომომპოვებელი მრეწველობა გაიზარდა, ტრანსპორტის სექტორში კი მინუს 6%-იანი ზრდა დაფიქსირდა.
ყველაზე სწრაფად მზარდი სექტორების ხუთეული:
- სამთომომპოვებელი მრეწველობა - 24.1%
- მშენებლობა - 12.8%
- ფინანსური შუამავლობა - 9.8%
- საფინანსო სექტორი - 9.4%
- შინამეურნეობების საქმიანობა - 9.5%
ყველაზე ნელა მზარდი სექტორების ხუთეული:
- ტრანსპორტი - (-6%)
- ვაჭრობა - (-2.8%)
- ენერგეტიკა - 0.3%
- ჯანდაცვა - 1%
- სოფლის მეურნეობა - 1.7%
