ერთიანი ნაციონალური მოძრაობის წევრი ოთო კახიძე უმრავლესობის დეპუტატების ეკა ბესელიას და გია ვოლსკის განცხადებებს უტიფრობად აფასებს. მისი თქმით, ხელისუფლებამ იერიში მიიტანა საკონსტიტუციო სასამართლოს კონკრეტულ მოსამართლეებზე. ცნობისთვის, ქართული ოცნების დეპუტატებმა ენმ საკონსტიტუციო რევოლუციის მოწყობის მცდელობაში დაადანაშაულეს.
"ხელისუფლება არის აგონიაში. მას უკვე წარმოდგენილი აქვს არჩევნებში დამარცხება და უნდა რუსთავი 2-ის ჩახშობა. ამავე დროს, ხელისუფლებას სურს, რომ პოლიტიკური პატიმრები განუსაზღვრელი ვადით ჰყავდეს ციხეში. ამაში ხელს უშლით კონსტიტუციური უფლებების მთავარი გარანტი საკონსტიტუციო სასამართლო. ეს არის იერიში, რომელიც სასამართლოზე მიიტანეს, განსხვავებით საერთო სასამართლოებისა, სადაც იპოვეს მათ პირობითი ურთმელიძე, შემდეგ პირობითი ნაზღაიძე და ახლა უკვე ეძებენ პირობით ასევე ურთმელიძეს უზენაეს სასამართლოში. საკონსტიტუციო სასამართლოში არის 9 მოსამართლე და იძულებული გახდნენ, რომ იერიში მიეტანათ კონკრეტულ მოსამართლეებზე. ეს არის უტიფარი ბრალდება. როდესაც ცვლიან კანონს და შედგომ, მათ მიერ ჩანერგილი მოსამართლე მერაბ ტურავა თავიდან აწყებინებს საქმის განხილვას სასამართლოს, როდესაც 4 მოსამართლე შუამდგომლობს, რომ პროკურატურას გადავცეთ უფლება, ამ დროს ნაციონალური მოძრაობის დადანაშაულება გარიგებაში არის უტიფარი განცხადება. მე სხვანაირად ამას ვერ შევაფასებ", - აცხადებს ოთო კახიძე.
ქართული ოცნების დეპუტატებმა ნაციონალური მოძრაობა საკონსტიტუციო რევოლუციის მოწყობის მცდელობაში დღევანდელ ბრიფინგზე დაადანაშაულეს. გიორგი ვოლსკი და ეკა ბესელია საკონსტიტუციო სასამართლოში მიმდინარე პროცესების უკან საპარლამენტო უმცირესობის ინტერესებს ხედავენ.
სპეციალურ ბრიფინგზე განცხადება გააკეთა ფრაქცია ქართული ოცნების ლიდერმა გია ვოლსკიმაც. მისი მტკიცებითაც, "შემოსულ სარჩელზე წინასწარ არის გავლილი კონსულტაციები პირველ კოლეგიაში და შემდეგ არის დამატებული და შესწორებული შინაარსობრივად". დეპუტატის თქმით, იკვეთება მოსამართლეების თანამშრომლობა სარჩელის შემომტან პოლიტიკურ ფიგურებთან.
აღსანიშნავია, რომ უმრავლესობის დეპუტატები საკონსტიტუციო სასამართლოს მოსამართლის მერაბ ტურავას რამდენიმე დღის წინ გაკეთებულ განცხადებაზე საუბრობენ. ტურავას მტკიცებით, ბოლო პერიოდის მანძილზე, საკონსტიტუციო სასამართლოში შეტანილი სარჩელები შეიცვალა.
"იყო შემთხვევა, როდესაც მხარემ შემოიტანა საკონსტიტუციო სარჩელი პარასკევს, ეს სარჩელი არ აკმაყოფილებდა წაყენებულ მოთხოვნებს, მაგრამ კვირის ბოლოს ეს სარჩელი შეიცვალა. შესაბამისად, ჩემთვის მნიშვნელოვანია, რა პროცედურით, რა წესებით, რომელი პრაქტიკით მოხდა შემოტანილი სარჩელის შეცვლა ახალი სარჩელით. ჩემი წარმოდგენით ეს არის სამართალდარღვევა", - ამბობს ტურავა.