სოჭის ოლიმპიადა უკრაინაში განვითარებულ მოვლენებთან კავშირში არ არის. ამის შესახებ საქართველოს ვიცეპრემიერმა და ენერგეტიკის მინისტრმა კახა კალაძემ ტელეკომპანია იმედის ეთერში განაცხადა.
"ეს პოლიტიკური თემაა. პოლიტიკა და სპორტი უნდა გავმიჯნოთ ერთმანეთისგან. ბოლო პერიოდში საქართველოში არა მხოლოდ სპორტი - მედიცინა, ხელოვნება ძალიან პოლიტიზირებული იყო და ეს ძალიან ცუდია. სპორტი უნდა იყოს ყველაფრისგან თავისუფალი", - აღნიშნა კალაძემ.
ვიცეპრემიერის თქმით, მას როგორც მოქალაქეს და სპორტსმენს მიაჩნია, რომ ქართველი სპორტსმენები სოჭის ოლიმპიადაზე აუცილებლად უნდა წავიდნენ. "მე წარმატებას ვუსურვებ მათ და ყველაფერი უნდა გააკეთონ, რომ მედალი ჩამოუტანონ ჩვენს ქვეყანას", - აღნიშნა კალაძემ.