ნაციონალური მოძრაობის წევრის ირმა ნადირაშვილის თქმით, საქართველოს ხელისუფლების პოზიცია სოჭის ოლიმპიადაზე გამგზავრებასთან დაკავშირებით მართებულია.
"ჩვენ ვამბობდით, რომ სულ მცირე ძალიან უხერხული იქნებოდა, პუტინის გვერდით დამდგარიყო საქართველოს სამთავრობო დელეგაცია - იმ ადამიანის გვერდით, რომელსაც ოკუპირებული აქვს ქვეყნის 20 პროცენტი და დღესაც მავთულხლართებს აბამს საქართველოში. ჩვენ ვთვლიდით, რომ დელეგაცია არ უნდა წასულიყო და სპორტსმენებს თვითონ გაეკეთებინათ არჩევანი - წავიდოდნენ თუ არა ამ ოლიმპიადაზე მონაწილეობის მისაღებად. აქედან გამომდინარე, ჩვენ კმაყოფილები ვართ, რომ მთავრობამ ნაციონალური მოძრაობის ეს პოზიცია გაიზიარა და ვთვლით, რომ გადაწყვეტილება მართებულია", - აღნიშნა ნადირაშვილმა.
შეგახსენებთ, რომ საქართველოს პრემიერმინისტრმა ირაკლი ღარიბაშვილმა ტელეკომპანია ღთ-სთან ინტერვიუში თქვა, რომ სოჭის ოლიმპიადაზე საქართველოს სამთავრობო დელეგაცია არ გაემგზავრება. "მთავრობა სოჭში არ გაემგზავრება. წავლენ მხოლოდ სპორტსმენები და ეროვნული ოლიმპიური კომიტეტის წარმომადგენლები", - თქვა ღარიბაშვილმა.
