ცხინვალში ალა ჯიოევას მომხრეებმა შეიმუშავეს მიმართვა რუსეთის პრეზიდენტის და პრემიერ-მინისტრის სახელზე . მიმართვის ადრესატებს ჯიოევას მომხრეები სთხოვენ ყურადღება მიაქციონ მოსკოვის იმ წარმომადგენლების საქციელს, რომლებიც ” რესპუბლიკის ხელმძღვანელობის უკანონო ქმედებებს უჭერენ მხარს.” ” სანამ გვიან არაა ობიექტურად შეაფასეთ სიტუაცია, ჩვენი ხალხი არ იმსახურებს ისეთ უსამართლო დამოკიდებულებას, როგორსაც მოსკოვის წარმომადგენლები ავლენენ. ისინი ცდილობენ გაწელონ დრო და შეუქმნან მოქმედ ხელისუფლებას თავისი გადაწყვეტილების გატარების საშუალება ”- ნათქვამია მიმართვაში.
ალა ჯიოევამ მანამდე განაცხადა, რომ უარს ამბობს მოლაპარაკებებზე , რომელიც მოსკოვის წარმომადგენლის სერგეი ვინოკუროვის შუამავლობით მიმდინარეობდა. ” ეს მოლაპარაკებები იყო უშედგო. ედუარდ კოკოითი უკან არ იხევს მხოლოდ იმიტომ, რომ გრძნობს მოსკოვის მხარდაჭერას”- უთხრა მომხრეებს ჯიოევამ. ორშაბათს, ცხინვალში განვითარებულ მოვლენებს დიმიტრი მედვედევი გამოეხმაურა, მან იქ არსებული დაპირისპირება კლანებს შორის დაპირისპირების ჭრილში განიხილა.
ჯიოევამ მოუწოდა კოკოითის 2 დღის მანძილზე დატოვოს რეგიონის ტერიტორია, თუმცა მას არ დაუკონკრეტებია რას მოიმოქმედებს ოპოზიცია, თუკი კოკოითი მოთხოვნას არ დააკმაყოფილებს.
