გაერთიანებულმა სამეფომ 9 მაისს განაცხადა, რომ შესაბამისი პირობების შექმნის შემდეგ ჰორმუზის სრუტის დასაცავად პოტენციური მრავალეროვნული მისიისთვის მომზადების ფარგლებში, სამხედრო გემი HMS Dragon ახლო აღმოსავლეთში გაგზავნეს.
HMS Dragon, რომელიც საჰაერო თავდაცვის დანიშნულების მქონე საესკადრო ნაღმოსანია, კვიპროსის დაცვის მიზნით ხმელთაშუა ზღვის აღმოსავლეთ ნაწილში მარტში გაიგზავნა მას შემდეგ აშშ-მ და ისრაელმა ირანის წინააღმდეგ საბრძოლო მოქმედებები წამოიწყეს.
"HMS Dragon-ის წინასწარი განლაგება გონივრული დაგეგმვის ნაწილია, რომელიც უზრუნველყოფს რომ გაერთიანებული სამეფო, UK-ისა და საფრანგეთის ერთობლივი ხელმძღვანელობის მქონე მრავალეროვნული კოალიციის ფარგლებში, მზადაა, სრუტეში უსაფრთხოება უზრუნველყოს, როცა ვითარება ამის საშუალებას მოგვცემს," განაცხადა გაერთიანებული სამეფოს თავდაცვის სამინისტროს სპიკერმა.
მანამდე იგივე ძალისხმევის ფარგლებში რეგიონში ავიამზიდის მოიერიშე ჯგუფი გაგზავნა საფრანგეთმაც. საფრანგეთის არმიამ 7 მაისს განაცხადა, რომ ავიამზიდ "შარლ დე გოლის" მოიერიშე ჯგუფი, რომელსაც თან ახლავს იტალიისა და ნიდერლანდების სამხედრო გემები, წითელი ზღვის სამხრეთისკენ მიემართებოდა.
Reuters-ის ცნობით, საფრანგეთი და გაერთიანებული სამეფო უკვე რამდენიმე კვირაა სამშვიდობო წინადადებაზე მუშაობენ, რომლის მიზანიც ვითარების დასტაბილურებისა და კონფლიქტის აღმოფხვრის შემდეგ სრუტეში უსაფრთხო მიმოსვლისთვის საფუძვლის ჩაყრაა. Reuters-ის მიხედვით, გეგმა გულისხმობს ირანთან კოორდინაციასაც, ხოლო ათეულობით ქვეყანამ მოსამზადებელი შეხვედრების შემდეგ მისიაში მონაწილეობის მიღებასთან დაკავშირებით მზადყოფნა გამოხატა.
