გერმანიის უმსხვილეს აეროპორტებში მიწისზედა მომსახურებისა და ავიაციის უსაფრთხოების თანამშრომლებისა და საჯარო მოსამსახურეების 24-საათიანი გაფიცვა დაიწყო.
გაფიცვა გერმანიის უმსხვილეს აეროპორტებს შეეხება - ფრანკფურტის, მიუნხენის, შტუტგარტის, კიოლნის/ბონის, დიუსელდორფის, დორტმუნდის, ჰანოვერის, ბრემენის, ჰამბურგის, ბერლინ-ბრანდენბურგისა და ლაიფციგ-ჰალეს აეროპორტებს.
გერმანიის აეროპორტთა ასოციაციის (ADV) ინფორმაციით, მოსალოდნელია, რომ დაახლოებით 3 400 ფრენა გაუქმდება, რაც 510 000 მგზავრის გეგმებზე აისახება.
გერმანულმა საავიაციო ჯგუფმა, Lufthansa-მ განაცხადა, რომ მათი ავიახაზების ფრენებს "შეფერხება და მრავალი გაუქმება" შეეხება.
ფრანფკურტის აეროპორტმა მგზავრებს სერიოზული შეფერხებების შესახებ გააფრთხილა და მოუწოდა, "ავიახაზებთან თავიანთი ფრენის სტატუსი შეამოწმონ, სანამ აეროპორტში მოვლენ".
დასაქმებულებს გაფიცვისკენ პროფკავშირმა, Ver.di-მ მოუწოდა, მას შემდეგ, რაც ხელფასის ზრდაზე მოლაპარაკებების მეორე რაუნდი ჩაიშალა.
Ver.di დაახლოებით 2.5 მილიონი დასაქმებულისთვის კოლექტიური ხელშეკრულების გაფორმებას ცდილობს.
პროფკავშირი, მათ შორის, დასაქმებულთა ხელფასების 8%-იან ზრდას, უფრო მაღალ ბონუსებსა და შვებულების დღეთა მომატებას ითხოვს.
გერმანიის ფედერალური მთავრობისა და ადგილობრივი ხელისუფლებების თქმით, პროფკავშირის მოთხოვნები განხორციელებადი არ არის.
9 მარტს, მასშტაბური გაფიცვის გამოცხადებამდე, ჰამბურგის აეროპორტში მიწისზედა მომსახურების თანამშრომლები გაფრთხილების გარეშე გაიფიცნენ და მუშაობა ნაადრევად შეწყვიტეს.
როგორც ჰამბურგის აეროპორტის წარმომადგენელმა საინფორმაციო სააგენტო dpa-ს უთხრა, გაფიცვის შედეგად 144 ჩასვლისა და 139 გამგზავრების ფრენებიდან მხოლოდ 10 დილის რეისი შესრულდა, დანარჩენი კი გაუქმდა. გაფიცვა დაახლოებით 40 000 მგზავრს შეეხო.
Ver.di-ს წარმომადგენელმა dpa-სთან თქვა, რომ ამ კვირაში სახელმწიფო აეროპორტებში დამატებითი გაფიცვები იგეგმება.
