NCDC-ის ყოფილი დირექტორი, ამირან გამყრელიძე საპროტესტო აქციების დარბევისას გამოყენებულ მეთოდებზე განცხადებას ავრცელებს, რომელშიც ხელისუფლებას მოუწოდებს, არ დაუშვას გამოუსწორებელი შეცდომა ქვეყნის განვითარების გზაჯვარედინზე და აღნიშნავს, რომ "მოსახლეობასთან ასეთი ფართომასშტაბიანი დაპირისპირება არავის არასდროს არ მოუგია".
გამყრელიძე ამბობს, რომ მსგავსი მასშტაბის მშვიდობიანი პროტესტი არ ახსოვს. NCDC-ის ყოფილი დირექტორის თანახმად, სახელმწიფო აქციის მონაწილეების წინააღმდეგ არაპროპორციულ ძალას იყენებს და დაპირისპირება "კრიტიკულ ზღვარს" მიუახლოვდა. მისივე თქმით, ეს ესკალაცია შეიძლება უმართავ პროცესებში გადაიზარდოს, რაზეც პასუხისმგებელი სახელმწიფო იქნება.
განცხადების თანახმად, გამყრელიძეს 9 აპრილის გარდა არ ახსოვს, რომ რომელიმე პროტესტზე ასობით ახალგაზრდას მიზანმიმართული ტრავმული დაზიანებები მიეღო და ათასობით ადამიანი მრავალი დღის განმავლობაში ე.წ. ცრემლსადენი გაზისა და წიწაკის სპრეის ზემოქმედების ქვეშ ყოფილიყო. მისივე თქმით, ეს ხანგრძლივი ზემოქმედება "უკვალოდ არ ჩაივლის" და ზემოქმედების ქვეშ მოქცეული ადამიანების, მათ შორის, მშვიდობიანი დემონსტრანტების, ახლოს მცხოვრები მოსახლეობისა და თავად სპეცრაზმელების ჯანმრთელობაზე აისახება.
გამყრელიძის თქმით, დარწმუნებულია, რომ სამედიცინო პერსონალი საკუთარ საქმეს სათანადოდ ასრულებს, თუმცა ხაზს უსვამს, რომ მათ აქციის მონაწილეებს ცრემლსადენი გაზის გამოყენების შედეგად ჯანმრთელობისთვის არსებულ რისკებზე ინფორმაცია რეგულარულად უნდა მიაწოდონ და მათთვის პრევენციული საშუალებების ადგილზე ხელმისაწვდომობა უნდა უზრუნველყონ.
NCDC-ის ყოფილი დირექტორის ხელისუფლებას მოუწოდებს, რომ პოლიტიკური კრიზისი გამოუვალ ჩიხში არ შეიყვანოს. მისი თქმით, ეს მხოლოდ რუსეთს გაახარებს, დასავლელი პარტნიორები კი საქართველოს ევროატლანტიკური ინტეგრაციის გაგრძელებისკენ მოუწოდებენ, რაც რეალურ გამოსავალს წარმოადგენს. გამყრელიძე აღნიშნავს, რომ "ახალგაზრდებთან ბრძოლაში ვერასოდეს ვერ და არ უნდა გაიმარჯვოს მამების თაობამ".
მივმართავ მათ, ვისაც ეს ეხება, დღეისთვის ჩვენს ქვეყანაში გადაწყვეტილებების მიმღებ პირებს!
როგორც საქართველოს თითოეული მოქალაქე, მეც ერთ-ერთი, სპეციალობით ექიმი, ბევრის მნახველი და მონაწილე, მათ შორის, კრიზისული სიტუაციების, ვაკვირდები მიმდინარე მშვიდობიან საპროტესტო აქციებს მთელს საქართველოში, რომელშიც მონაწილეობს ასი ათასობით მოქალაქე, რომლის მსგავსი მასშტაბის არ მახსოვს. სამწუხაროდ, უკვე მე-9 დღეა სახელმწიფო იყენებს, განსაკუთრებით თბილისში, სხვადასხვა ფორმის არაპროპორციულ ძალას და დაპირისპირება უკვე მიუახლოვდა კრიტიკულ ზღვარს. როგორც ექიმი და ათეული წლების განმავლობაში პიროვნება მდგარი საქართველოს მოსახლეობის ჯანმრთელობის სადარაჯოზე, ძალიან განვიცდი ასეთ ესკალაციას, რომელიც შეიძლება გადაიზარდოს უმართავ პროცესებში და ამაზე მთელი პასუხისმგებლობა სრულად სახელმწიფოს დაეკისრება". - წერს გამყრელიძე.
პროტესტის მონაწილეთა დიდი ნაწილი ჩვენი მომავალი თაობა, ახალგაზრდობაა და მათზე ხელის აღმართვა დღეს გამოყენებული მეთოდებით, რაც ხდება და გამოიხატება ასობით ადამიანის მიზანმიმართული ტრავმული დაზიანებების გამო ჰოსპიტალიზაციაში, მათ შორის რთული დაზიანებებით და ათასობით ადამიანის ე.წ. ცრემლსადენი გაზით და წიწაკის სპრეით ხანგრძლივ ექსპოზიციაში (მრავალი დღის განმავლობაში ზემოქმედება), არცერთი მსგავსი პროტესტის დროს არ ყოფილა ქვეყანაში ჩემს მეხსიერებაში, თუ არ ჩავთვლით ცხრა აპრილს, როცა სამწუხაროდ იყო გამოყენებული სხვა ტიპის მომწამვლელი ნივთიერება და გვქონდა მსხვერპლი, ღმერთმა დაგვიფაროს მსგავსისგან. იყო მხოლოდ ერთჯერადი (ერთდღიანი) გამოყენება და დამერწმუნეთ, ეს ხანგრძლივვადიანი ზემოქმედება უკვალოდ არ ჩაივლის ექსპოზირებული ადამიანების ჯანმრთელობის თვალსაზრისით, იქნებიან ესენი მშვიდობიანი პროტესტანტები, ახლოში მცხოვრები მოსახლეობა თუ თვითონ სპეცრაზმელები. დარწმუნებული ვარ, რომ ჩემი კოლეგები, სასწრაფო დახმარების თუ საავადმყოფოების სამედიცინო პერსონალი ყველაფერს აკეთებენ ადამიანთა დროული სამედიცინო დახმარებისთვის როგორც ყოველთვის და ისტორიულად ასეთი ტიპის კრიზისების დროს სამედიცინო პერსონალი ყოველთვის მოწოდების დონეზეა, მაგრამ საჭიროა რომ აქციის მონაწილეებს რეგულარულად მიეწოდოთ სრული ინფორმაცია ცრემლსადენი გაზის გამოყენების დროს ჯანმრთელობის რისკების შესახებ და მათთვის ხელმისაწვდომი იყოს პრევენციული საშუალებები ადგილებზე (სულ მცირე, N95 ნიღბები, ფიზიოლოგიური ხსნარი და წყალი კანის ზედაპირისა და სახის სწრაფი დამუშავებისა და ტანსაცმლის დეკონტამინაციისთვის, დაურიგდეს მათ ნაბეჭდი რეკომენდაციები თუ როგორი პრევენციული ღონისძიებები გაატარონ ამ დროს და სისტემატურად ცხადდებოდეს ეს რადიოთი და სოციალური მედიით. ეს უნდა უზრუნველყოს შესაბამისმა სახელმწიფო სტრუქტურებმა).
თვალს ნუ დავხუჭავთ, რომ ქვეყანაში პოლიტიკური კრიზისია, ის სულ უფრო და უფრო მწვავდება და ნუ შევიყვანთ მას გამოუვალ ჩიხში, საიდანაც გამოსვლა სულ უფრო ძალიან რთული იქნება. კარგად იცით, რომ ეს ახარებს მხოლოდ ერთ ქვეყანას, ჩრდილოელ მეზობელს, რომელსაც მუდმივი ქაოსი უნდა ამ ქვეყანაში და ნუ გავახარებთ მტერს. ჩვენი ნამდვილი მეგობრები გვთავაზობენ გამოსავლის რეალურ გზებს, რომ ჩვენ კვლავ დავრჩეთ დასავლურ ორბიტაზე და ხელიდან არ გაუშვათ ევრო და ჩრდილო- ატლანტიკური ინტეგრაციის გზაზე დარჩენის რეალური შანსი. ნუ დავუშვებთ გამოუსწორებელ შეცდომას ქვეყნის განვითარების ამ გზაჯვარედინზე. ახალგაზრდობასთან ბრძოლაში ვერასოდეს ვერ და არ უნდა გაიმარჯვოს მამების თაობამ, ეს დიალექტიკის კანონია. ასეთი კრიზის დროს ძლიერმა უნდა დათმოს და ეს სისუსტის ნიშანი არ იქნება, პირიქით სიბრძნისა და სწორი სტრატეგიული ხედვის.
კრიზისის განმუხტვის გასაღები ჯერ კიდევ თქვენს ხელშია. მოსახლეობასთან ასეთი ფართომაშტაბიანი დაპირისპირება არავის არასდროს არ მოუგია, ის ქვეყანას მხოლოდ გამოუსწორებელ ზიანს მიაყენებს. ნუ დავუშვებთ გამოუსწორებელ შეცდომას და ნუ გავახარებთ მტრებს!
