რუსეთში, ბაშკირეთის რესპუბლიკის ქალაქ სტერლიტამაკში მდებარე სამხედრო ქარხანა ავანგარდში აფეთქებას სამი ადამიანი ემსხვერპლა. ამის შესახებ მედია РБК-ს სახელმწიფო კორპორაცია Ростех-მა უთხრა.
სამხედრო საწარმო ავანგარდი Ростех-ის საკუთრებაა და რუსეთის თავდაცვის სამინისტროს დაკვეთით ზალპური ცეცხლის რეაქტიული სისტემებისთვის ნაწილებს ამზადებს. ამასთან, რუსეთ-უკრაინის ომის გამო ავანგარდის წინააღმდეგ ევროკავშირის, შვეიცარიისა და უკრაინის სანქციებიც მოქმედებს.
РБК-ის თანახმად, შემთხვევა მილსადენის დემონტაჟის დროს მოხდა და შედეგად სარემონტო ბრიგადის სამივე წევრი დაიღუპა.
საგამოძიებო კომიტეტის ცნობით, შემთხვევასთან დაკავშირებით საქმე არის აღძრული და ნავარაუდებია, რომ მუშებმა მილების ჭრის დროს უსაფრთხოების პრინციპები დაარღვიეს.
