ქართული ოცნების მიერ რუსული კანონის ხელმეორედ მიღების მცდელობას გამოეხმაურა რუსეთის სახელმწიფო დუმის თავმჯდომარე და უსაფრთხოების საბჭოს წევრი ვიაჩესლავ ვოლოდინი.
"უცხოეთის აგენტების შესახებ.
საქართველოში ვნებათაღელვაა. განიხილავენ უცხოეთის გავლენის აგენტების კანონს. კრიტიკოსები ამბობენ, რომ კანონის მიღება რუსეთის ინტერესებშია.
ამასთან დაკავშირებით, სწორი იქნება ვთქვათ შემდეგი: ნებისმიერმა სახელმწიფომ, რომელსაც უნდა, რომ სუვერენული იყოს, რომელშიც ხალხს საკუთარი მომავლის განსაზღვრის უფლება აქვს, ვალდებულია მიიღოს უცხოეთის აგენტების კანონი, რომლის არსი უცხოეთიდან შიდა საქმეებში ჩარევის აღკვეთაში მდგომარეობს.
კანონის მიღების მოწინააღმდეგეები ერთმნიშვნელოვნად სხვა სახელმწიფოს ინტერესებში მოქმედებდნენ.
უცხოეთის აგენტების კანონის ისტორია 1938 წელს აშშ-ში დაიწყო. უნდა ითქვას, რომ მისი ნორმები დღემდე მსოფლიოში ყველაზე მკაცრად რჩება. კანონი ნებას რთავს ისეთი გადაწყვეტილებების მიღებას, რომლებიც ზღუდავს სიტყვის თავისუფლებას, ართულებს მედიის მუშაობას და ინფორმაციის გავრცელებას. მოთხოვნების დარღვევა კი 5-წლიან პატიმრობას ითვალისწინებს.
დღეს, აშშ-ს გარდა, ამა თუ იმ, მაგრამ გაცილებით ლიბერალური ფორმით მოქმედებს ბრიტანეთში, ისრაელში, ავსტრალიაში და სხვა ქვეყნებში. რუსეთში ეს კანონი 2012 წელს იქნა მიღებული.
მიუხედავად ვაშინგტონისა და ბრიუსელის ზეწოლის, ამას წინად კანონი მიიღეს უნგრეთსა და ყირგიზეთში. უცხოეთის გავლენის შეზღუდვა განიხილება არა მხოლოდ საქართველოში, არამედ საფრანგეთშიც. ოღონდ თბილისისგან განსხვავებით, პარიზში არ არის საპროტესტო აქციები, არც შენიშვნები აშშ-სა და ევროკავშირის მხრიდან.
ყველაფერი ვაშინგტონის პოლიტიკის ბრალია, რომლის სათავეში საკუთარი ექსკლუზიურობის, სხვებზე უპირატესობისა და ორმაგი სტანდარტების პრინციპები დგას.
ერთ ქვეყნებს, რომლებიც მზად არიან ვაშინგტონს ემსახურონ შეუძლიათ კანონის მიღება, ოღონდ მხოლოდ აშშ-ს ნებართვით. სხვებს, რომელთაც სურთ უცხოეთის გავლენისა და ქვეყნის დამონების შეჩერება, ასევე დამოუკიდებელი პოლიტიკის წარმოება და დამოუკიდებლობისკენ სწრაფვა – არ შეუძლიათ. ამ შემთხვევაში ხდება ქუჩის გამოსვლების, არეულობისა და უცხოური წნეხის ორგანიზება. ზუსტად ეს ხდება საქართველოში.
ასეთი ისტერიკა უცხოეთს გავლენის აგენტების კანონის გარშემო მხოლოდ იმაზე მეტყველებს, რომ ვაშინგტონს და ბრიუსელს საქართველოს მოქმედი ხელისუფლების დამხობა აქვს გადაწყვეტილი, ამაზე ფული უკვე გამოყოფილია და კანონის მიღებამ შესაძლოა ეს გეგმები ჩაშალოს". – წერს საკუთარ ტელეგრამ არხზე ვოლოდინი.
17 აპრილს საქართველოს პარლამენტმა რუსულ კანონს I მოსმენით მხარი დაუჭირა - მომხრე 83 დეპუტატი იყო, ხოლო მოწინააღმდეგე – არცერთი. კენჭისყრას არ ესწრებოდა ოპოზიცია.
ივანიშვილის ხელისუფლებას უკვე მეორედ სურს გასულ წელს მოქალაქეების პროტესტით შეჩერებული რუსული კანონის მიღება. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
