ისრაელის პრემიერმინისტრმა მოსახლეობას მიმართა და განაცხადა, რომ ირანისგან მომავალი დარტყმისთვის ისრაელი მზად არის და თავდასხმას სათანადო პასუხს გასცემს.
"ბოლო წლებში, და უფრო მეტად ბოლო კვირებში, ისრაელი ირანისგან შესაძლო პირდაპირი დარტყმისთვის ემზადებოდა". - ამბობს ნეთანიაჰუ ვიდეოში.
მისი თქმით, ისრაელის თავდაცვითი სისტემები გამზადებულია და ნებისმიერი სცენარისთვის არიან მზად, როგორც თავდაცვის, ასევე თავდასხმის მხრივ.
ისრაელის პრემიერმა ასევე თქვა, რომ "მადლობელი ვართ აშშ-ს მხრიდან ისრაელის გვერდში დგომისთვის, ისევე როგორც დიდი ბრიტანეთის, საფრანგეთისა და მრავალი სხვა ქვეყნის მხარდაჭერისთვის".
"მე დავამკვიდრე მკაფიო პრინციპი - ვინც გვატკენს, ჩვენც ვატკენთ. ჩვენ თავს ნებისმიერი საფრთხისგან დავიცავთ და ამას მშვიდად და მიზანდასახულად გავაკეთებთ".
ვიდეო მიმართვის ბოლოს ნეთანიაჰუ მოსახლეობას მოუწოდებს, რომ ისრაელის სარდლობის დირექტივებს მოუსმინოს.
