სტატისტიკის ეროვნული სამსახურის ინფორმაციით, საქართველოს რეზიდენტებმა საზღვარგარეთ ვიზიტებისას 2 მლრდ ლარი დახარჯეს, რაც 11.5%-ით აღემატება წინა წლის ანალოგიურ მაჩვენებელს. ამასთან, ვიზიტზე საშუალო ხარჯი 2022 წელთან შედარებით 15.9%-ით შემცირდა და 906.7 ლარს გაუტოლდა.
საქსტატის მონაცემებით, ამ ტიპის ვიზიტებისას გაწეული ხარჯების განაწილება კატეგორიების მიხედვით შემდეგია:
- საყიდლები - 853 მლნ ლარი (41.9%)
- საკვები და სასმელი - 501.9 მლნ ლარი (24.6%)
- განთავსება - 339.6 მლნ ლარი (16.7%)
- ადგილობრივი ტრანსპორტი - 189.6 მლნ ლარი (9.3%)
- გასართობი, გამაჯანსაღებელი, კულტურული და სპორტული ღონისძიებები - 90.9 მლნ ლარი (4.5%)
- სხვა - 61.8 მლნ ლარი (3.0%)
გარდა ამისა, 2023 წელს ქვეყნიდან საქართველოს 2.8 მლნ რეზიდენტი მოგზაური გავიდა საზღვარგარეთ, რაც 31.6%-ით მეტია წინა წლის ანალოგიურ მაჩვენებელზე.
საქსტატის ინფორმაციითვე, აღნიშნული რაოდენობიდან საქართველოს რეზიდენტი ვიზიტორების საზღვარგარეთ ვიზიტების რაოდენობამ 2.2 მილიონი შეადგინა, რაც 32.7%-ით მეტია 2022 წლის ანალოგიურ მაჩვენებელზე.
საქართველოს რეზიდენტები გასულ წელს უმეტესად თურქეთსა და სომხეთს სტუმრობდნენ.
ვიზიტების რაოდენობის განაწილება მონახულებული ქვეყნების მიხედვით:
- თურქეთი - 43.3%
- სომხეთი - 15.0%
- რუსეთი - 12.5%
- ევროკავშირის წევრი ქვეყნები - 14.5%
- აზერბაიჯანი - 1.9%
- სხვა ქვეყნები - 12.7%
მონახულებული ქვეყნების სიხშირის მიხედვით, იმავე ტენდენცია შეინიშნებოდა გასული წლის მე-4 კვარტალშიც, როდესაც საქართველოს რეზიდენტებს შორის პოპულარობით სარგებლობდა თურქეთი და სომხეთი. ამასთან, ამავე პერიოდში საქართველოს რეზიდენტმა მოგზაურებმა საზღვარგარეთ ვიზიტებისას 557.9 მლნ ლარი დახარჯეს, რაც 5.1%-ით მეტია წინა წლის ანალოგიურ პერიოდთან შედარებით.