რუსეთის საგარეო საქმეთა სამინისტროს მიერ 13 ოქტომბერს გავრცელებული ინფორმაციის თანახმად, მოსკოვი ჰამასთან კონტაქტს ინარჩუნებს.
"ჩვენ ყველასთნ გვაქვს კონტაქტი. ჰამასის ხელმძღვანელობასთანაც გვაქვს წვდომა". - უთხრა ჟურნალისტებს რუსეთის საგარეო საქმეთა მინისტრის მოადგილემ, მიხაილ ბოგდანოვმა.
რუსი მაღალჩინოსნის თქმითვე, ღაზის სექტორიდან მძევლების გათავისუფლების საკითხი "ძალიან ფრთხილად და გულმოდგინედ" უნდა გადაწყდეს. მანვე აღნიშნა, რომ კრიზისის მოგვარების მცდელობის ფარგლებში რუსეთის წარმომადგენლები ახლო აღმოსავლეთში ჩასვლას გეგმავენ.
ბოგდანოვი ჩრდილოეთ ღაზის ევაკუაციის შესახებ ისრაელის მოთხოვნასაც გამოეხმაურა და თქვა, რომ ეს "ადამიანის უფლებების დარღვევაა" და დასძინა, რომ ისრაელის შესაძლო სახმელეთო შეტევის შემდეგ ღაზას შესაძლო "ოკუპაციის" წინააღმდეგია.
"ჩვენ ოკუპაციის წინააღმდეგი ვართ. არსებობს გაეროს უშიშროების საბჭოს რეზოლუცია, რომლის მიხედვითაც, პრინციპში, მშვიდობისა და უსაფრთხოების საფუძველია მიწა მშვიდობის სანაცვლოდ. ნორმალიზაცია ოკუპირებული არაბული ტერიტორიებიდან ისრაელის გასვლის სანაცვლოდ". - თქვა ბოგდანოვმა.
-
"კონფლიქტის მოგვარების გზა პალესტინის აღიარებაა" - ჩინეთი და რუსეთი შეშფოთებას გამოხატავენ
-
რუსეთი ჰამასსა და ისრაელს შორის სამშვიდობო მომლაპარაკებლის როლზე პრეტენზიას გამოთქვამს
-
ვლადიმირ პუტინმა ღაზის სექტორის ბლოკირება ლენინგრადის ბლოკადას შეადარა
ღაზის სექტორიდან ისრაელზე მოულოდნელი სახმელეთო და სარაკეტო თავდასხმა 7 ოქტომბერს დაიწყო. ტერორისტები ქვეყნის სამხრეთით მდებარე დასახლებებში შევიდნენ, სადაც სასტიკი დანაშაულები ჩაიდინეს და ხოცვა-ჟლეტა მოაწყვეს. აქ შეტაკებები რამდენიმე დღის განმავლობაში გრძელდებოდა.
ტერორისტებმა აიყვანეს ასზე მეტი მძევალი და ღაზის სექტორში გადაიყვანეს. ისრაელის თავდაცვის ძალებმა იმ კიბუცებში, სადაც ჰამასელები იმყოფებოდნენ, მძიმე სურათები აღმოაჩინეს. ცნობების მიხედვით, იპოვეს დახოცილი, თავმოკვეთილი ბავშვებიც, რაც აშშ-ს პრეზიდენტმა, ჯო ბაიდენმაც დაადასტურა. თავდასხმის პირველ დღეს გავრცელდა ჩანაწერებიც, რომლებშიც ისრაელელი ჯარისკაცების ცხედრების შეურაცხყოფის ფაქტებიც ჩანდა.
ისრაელმა სამხრეთის ტერიტორიების ტერორისტებისგან გაწმენდასთან ერთად ღაზის სექტორში ჰამასის ობიექტებზე სარაკეტო იერიშების მიტანა დაიწყო, რაც უკვე რამდენიმე დღე გრძელდება. პარალელურად, დროგამოშვებით, შეტაკებები ისრაელის ჩრდილოეთ საზღვარზეც ხდება. ამ მიმართულებით, ლიბანის სამხრეთ ტერიტორიას აკონტროლებს ირანის მიერ მხარდაჭერილი დაჯგუფება ჰეზბოლა.
საფრთხე, რომელიც ღაზიდან მოდიოდა, განადგურდება – ინტერვიუ საქართველოში ისრაელის ელჩთან
აშშ-ს პრეზიდენტმა, ჯო ბაიდენმა ისრაელის მიმართულებით სამხედრო ავიამზიდი, საბრძოლო ხომალდები და ავიაგამანადგურებლები გააგზავნა. მსგავსი ნაბიჯი გადადგა დიდმა ბრიტანეთმაც.
ისრაელმა ღაზის სექტორი სრულ ბლოკადაში მოაქცია. 13 ოქტომბერს ღაზის ჩრდილოეთში მცხოვრებმა მშვიდობიანმა მოსახლეობამ მიიღო გაფრთხილება, რომ ტერიტორია 24 საათში დაეტოვებინათ. ისრაელი, სავარაუდოდ, სახმელეთო ოპერაციისთვის ემზადება. მზადყოფნაშია 300 000 რეზერვისტი. აქამდე ისრაელის მაღალჩინოსნები დებდნენ პირობას, რომ ჰამასი განადგურდება და ღაზის სექტორში რეალობა შეიცვლება.