13 ოქტომბრის დილით რუსული ჯარი დონეცკის ოლქის ქალაქ პოკროვსკს თავს დაესხა. ამის შესახებ ინფორმაცია საოლქო სამხედრო ადმინისტრაციის უფროსის მოვალეობის შემსრულებელმა იგორ მოროზმა გაავრცელა.
ბოლო მონაცემებით, თავდასხმის შედეგად დაიღუპა 1 ადამიანი, ხოლო 13 - დაშავდა. ამასთან, ნაწილობრივ დანგრეულია ორი ადმინისტრაციული შენობა.
უკრაინის საგანგებო სიტუაციების სახელმწიფო სამსახურის ინფორმაციით, ნანგრევებიდან სამი ადამიანი გამოიყვანეს.
"პოკროვსკში დაბომბვის ადგილზე საგანგებო სამაშველო სამუშაოები დასრულდა. ორი ნაწილობრივ დანგრეული ადმინისტრაციული შენობის ნანგრევებიდან 3 ადამიანი გამოიყვანეს". - ნათქვამია უკრაინის საგანგებო სამსახურის გავრცელებულ განცხადებაში.
ცნობილია, რომ საგანგებო სიტუაციების სამსახურში სამუშაოებში 23 მაშველი და 5 ტექნიკა მონაწილეობდა.