ოფიციალური კიევის თქმით, რუსმა ოკუპანტებმა აშშ-სა და ევროკავშირში წარმოებული, ხოლო შემდგომ უკრაინაში საომარი მოქმედებების დროს ხელში ჩაგდებული იარაღი ჰამასის ტერორისტებს გადასცეს. ინფორმაციას უკრაინის თავდაცვის სამინისტროს თავდაცვის დაზვერვა ავრცელებს.
უკრაინის თავდაცვის სამინისტროს თავდაცვის დაზვერვა მიიჩნევს, რომ რუსების პროვოკაცია მიზნად ისახავს შეიარაღებული ძალების დისკრედიტაციას და დასავლელი პარტნიორების მხრიდან უკრაინაში სამხედრო დახმარების ნაკადის სრულად შეჩერებას.
“რუსების გეგმის გათვალისწინებით, შემდეგი ნაბიჯის ფარგლებში რუსები სავარაუდოდ უკრაინელი ჯარისკაცების მიმართ ცრუ ბრალდებებს გაავრცელებენ დასავლური იარაღის ტერორისტებისათვის სავარაუდო მიყიდვის ფაქტთან დაკავშირებით”. - წერს უკრაინის თავდაცვის სამინისტროს დაზვერვის დეპარტამენტი.
ღაზის სექტორიდან ჰამასის ისრაელზე მოულოდნელი თავდასხმა 7 ოქტომბერს, ადგილობრივი დროით დილის 7 საათზე დაიწყო, როცა ისრაელის მიმართულებით ტერორისტებმა ასობით რაკეტა ისროლეს, პარალელურად კი სამხრეთით მდებარე ქალაქებში შეიჭრნენ.
თავდასხმა ერთდროულად ხმელეთიდან, ზღვიდან და ჰაერიდან განხორციელდა. ისრაელისთვის ეს სრულიად მოულოდნელი აღმოჩნდა.
თავდასხმის თარიღამდე ერთი დღით ადრე შესრულდა იომ კიპურის ომის (ეგვიპტისა და სირიის ისრაელზე თავდასხმის) 50 წლისთავი - ექსპერტების ნაწილი მიიჩნევს, რომ ეს შემთხვევითობა არ არის.
ჰამასის ტერორისტებმა დახოცეს ისრაელის ასობით მოქალაქე, მათ შორის, ქალები, ბავშვები და მოხუცები.
ტყვედ აიყვანეს ისრაელის ჯარისკაცები და სამოქალაქო პირები. ტერორისტები ტყვეებს, მათ შორის, ბავშვებს არაადამიანურად ეპყრობიან. მათი ნაწილი ღაზის სექტორში ბრბოს თვალწინ, აღლუმით ჩამოატარეს და ვიდეოები გაავრცელეს.
საპასუხოდ ისრაელმა ჰამასის წინააღმდეგ ანტიტერორისტული ოპერაცია "რკინის ხმლების" დაწყება გამოაცხადა და ტერიტორიების გათავისუფლებასთან ერთად ღაზის სექტორზე სარაკეტო იერიშების მიტანა დაიწყო.
8 ოქტომბერს ისრაელმა საომარი მდგომარეობა ოფიციალურად გამოაცხადა. პრემიერმინისტრი ნეთანიაჰუ ამბობს, რომ ჰამასი "ძლევამოსილი შურისგებისთვის" უნდა მოემზადოს. ღაზის სექტორში მცხოვრებლებს ისრაელი ტერიტორიის დატოვებისკენ მოუწოდებს.
