ნაფიც მსაჯულთა ინსტიტუტის თემა ტაბულას, თავისუფლების ინსტიტუტის, ევროპული საქართველოს დნმ თემაა და ჩვენ მიგვაჩნია, რომ ზოგადად მოქალაქეების ჩართულობა მართლმსაჯულების აღსრულების პროცესში უნდა გაფართოვდეს იმისთვის, რომ ჩვენ მივიღოთ ისეთი სისტემა, რომელიც უსამართლობას მაქსიმალურად გამორიცხავს. როგორი კანონიერიც არ უნდა იყოს ამა თუ იმ მოსამართლის გადაწყვეტილება, სამართლიანი ვერ იქნება, თუ მოქალაქეები ვერ აღიქვამენ მას სამართლიანად.
საზოგადოების სიჯანსაღისთვის, ძალიან მნიშვნელოვანია, მოქალაქეებს ჰქონდეთ განცდა, რომ სამართალს იპოვიან იმ შემთხვევაში, თუ მათ უსამართლოდ დაჩაგრავენ. ჩვენ ვართ ისეთ მდგომარეობაში, რომ საქართველოს მართლმსაჯულება სანქცირებულია დემოკრატიის ლიდერი სახელმწიფოს მიერ, რაც ნიშნავს, რომ ის არის დისკრედიტირებული.
არ არის საქმე ლაზარეში, არ არის საქმე პოლიტიკურ დევნილებში, არ არის საქმე მესამე პრეზიდენტში - პრობლემა არის სისტემაში. ხელისუფლებამ დაიწყო დემონიზირების კამპანია ამ ადამიანის წინააღმდეგ და ისიც გასაგებია, რომ არსებობენ მოქალაქეები, რომლებსაც მოლოტოვის კოქტეილის შესახებ კითხვები აქვთ და ბუნებრივია, არავის აქვს ასე ძალადობის უფლება - მაგრამ ყველაფერს აქვს თავისი კონტექსტი და გარემოებები. ძალიან მნიშვნელოვანია საზოგადოების კონსოლიდაცია ამ საკითხზე. მე მგონი, ყველაზე კომპრომისული გამოსავალი არის, განსაჯონ არა სანქცირებულმა მოსამართლეებმა, არა მიკერძოებულმა სასამართლომ, არამედ საქართველოს მოქალაქეებმა გამოიტანონ ვერდიქტი.
