მოლდოვის პრემიერმინისტრის, დორინ რეჩანის აზრით, რუსეთს მოლდოვაში შეჭრისთვის სათანადო რესურსი არ გააჩნია.
რეჩანის თქმით, რუსეთი მოლდოვას თავს ვერ დაესხმება ტერიტორიული დისტანციისა და იმ ფაქტის გამო, რომ უკრაინა ამ ორ სახელმწიფოს შორის მდებარეობს. პრემიერმა აღნიშნა, რომ უკრაინის საჰაერო თავდაცვის სისტემა მოლდოვასაც იცავს.
"რუსეთს თავდასხმისთვის სათანადო რესურსი არ გააჩნია. აშკარაა ისიც, რომ სამხედრო გზით ის მოლდოვაში ვერ შეიჭრება. რაც შეეხება დნესტრისპირეთს, მათაც ჩვენ მსგავსად მშვიდობა და სტაბილურობა სურთ. რუსეთი ჰიბრიდულ ომს აწარმოებს. მიზნების მისაღწევ საშუალებად პროპაგანდას, დეზინფორმაციასა და ომის გაღვივების ნარატივებს იყენებს. ამის მიუხედავად, მე დარწმუნებული ვარ, რომ ისინი წარმატებას ვერ მიაღწევენ. ამ ტალღებს მეტწილად საინფორმაციო ომის ფორმა აქვს და რეალობაში არ გადმოდის". - აღნიშნა დორინ რეჩანმა მოლდოვურ მედიასთან ინტერვიუში.
უკრაინის პრეზიდენტის, ვოლოდიმირ ზელენსკის თქმით, რუსეთი გააგრძელებს დნესტრისპირეთზე ცრუ ინფორმაციის გავრცელებას და ამასთან არ გამორიცხავს, რომ პუტინი თავს დაესხას სხვა ევროპულ ქვეყანას. ამის შესახებ ზელენსკიმ ომის წლისთავთან დაკავშირებულ კონფერენციაზე ისაუბრა.
მოლდოვაში ახალი პრემიერმინისტრის დანიშვნის შემდეგ კრემლმა აღნიშნა, რომ რუსეთსა და მოლდოვას შორის ურთიერთობა დაძაბულია, რადგან მოლდოვა რუსეთის საწინააღმდეგოდ მოქმედებს.
რუსეთის უკრაინაში შეჭრის შემდეგ, დნესტრისპირეთის რეგიონმა ახალი სტრატეგიული მნიშვნელობა შეიძინა.
ესკალაცია დნესტრისპირეთში გამოიწვია პროვოკაციულმა თავდასხმებმა, რომელთა უკანაც რუსეთის ფედერაცია უნდა იდგეს. არსებობს საფრთხე, რომ უკრაინაში მიმდინარე ომი მოლდოვის სეპარატისტულ რეგიონსაც შეეხოს და გაყინული კონფლიქტი კვლავ გადაიზარდოს კიშინიოვისა და მარიონეტული ტირასპოლის შეიარაღებულ დაპირისპირებაში.
მოლდოვის ოკუპირებული ტერიტორიის გარშემო კითხვის ნიშნები გააჩინა ბრიტანეთის დაზვერვის მიერ 10 აპრილს გავრცელებულმა ინფორმაციამაც, რომლის მიხედვითაც რუსეთი დნესტრისპირეთში უკრაინაში წასაყვანი მებრძოლების რეკრუტირებას ცდილობდა. აქამდე, რამდენიმე დღით ადრე, უკრაინის გენერალურმა შტაბმა რუსეთის ფედერაცია გააფრთხილა, რომ თუ სამხედრო თვითმფრინავებით ჯარის დნესტრისპირეთში გადასხმას ეცდებოდნენ, მათ ჩამოაგდებდნენ. ამ ყველაფერს მოჰყვა უკრაინის დაზვერვის 11 აპრილის ცნობა, რომლის მიხედვითაც რუსეთი დნესტრისპირეთში პროვოკაციებს, შემდეგ კი მათი კიევისთვის დაბრალებას აპირებდა.
სეპარატიზმი მოლდოვაში
1990-იან წლებში, მოლდოვაში, როგორც ბევრ სხვა პოსტსაბჭოთა ქვეყანაში, თავი იჩინა მწვავე გეოპოლიტიკურმა გამოწვევებმა. ქვეყანაში სეპარატიზმის კერები საბჭოთა კავშირის დანგრევამდე არსებობდა. მოლდოვის აღმოსავლეთში სხვადსხვა ეთნიკური ჯგუფები ცხოვრობდნენ, ძირითადად რუსები, უკრაინელები და გაგაუზები – ეთნიკური ჯგუფი, რომლის წარმომადგენლებიც ძირითადად მართლმადიდებლები არიან, ლინგვისტურად კი თურქულ ენებს ენათესავებიან. პარალელურად, მიხაილ გორბაჩოვის პერესტროიკისა და გლასნოსტის რეფორმებმა საბჭოთა სოციალისტურ რესპუბლიკებში ნაციონალისტური სენტიმენტების გაღვივებას ხელი შეუწყო, ამ გრძნობების მოზღვავებამ კი, უკვე 1990-იან წლებში გარკვეულ ეთნიკურ უმცირესობებში შიშები გააჩინა, რაც შემდეგში კრემლმა საკუთარ გეოპოლიტიკურ ინსტრუმენტად აქცია.
