შინაგან საქმეთა სამინისტროს ინფორმაციით, პეკინის ქუჩაზე საქართველოს ბანკის ფილიალის დაყაჩაღებისა და იარაღის უკანონო შეძენა-შენახვა-ტარების ბრალდებით 1999 წელს დაბადებული ი.ჯ. დააკავეს.
“გამოძიებით დადგინდა, რომ მიმდინარე წლის 14 დეკემბერს, ბრალდებული თავს დაესხა საქართველოს ბანკის ერთ-ერთ ფილიალს, იარაღის მუქარით თანხა გასტაცა ბანკის თანამშრომელს და შემთხვევის ადგილიდან მიიმალა.
პოლიციამ, ცხელ კვალზე ჩატარებული საგამოძიებო მოქმედებებისა და ოპერატიული ღონისძიებების შედეგად, დანაშაულის ჩამდენი პირი, მომხდარიდან რამდენიმე საათში დააკავა”. - ვკითხულობთ განცხადებაში.
შსს-ს ცნობით, დანაშაულის ჩადენის იარაღი და თანხა ნივთმტკიცებად ამოიღეს.
უწყების ინფორმაციით, გამოძიება სისხლის სამართლის კოდექსის 179-ე მუხლის მე-3 ნაწილის "გ" ქვეპუნქტით და 236-ე მუხლის მე-3 და მე-4 ნაწილებით მიმდინარეობს. დანაშაული 4-დან 12 წლამდე ვადით თავისუფლების აღკვეთას ითვალისწინებს.