იუსტიციის უმაღლესი საბჭოს არამოსამართლე წევრი და არასამთავრობო ორგანიზაცია სასამართლოს გუშაგის დამფუძნებელი, ნაზი ჯანეზაშვილი, იუსტიციის უმაღლესმა საბჭომ სააპელაციო სასამართლოს თავმჯდომარედ 5 წლის ვადით კვლავ მიხეილ ჩინჩალაძის დანიშვნას ეხმიანება.
როგორც ჯანეზაშვილი FACEBOOK-ზე წერს, მოსამართლეებმა ჩინჩალაძე ერთხმად აირჩიეს.
"ერთხმად აირჩიეს ჩინჩალაძე 5 წლის ვადით, როგორც მოსამართლე - 65 წლამდე იქნება".- წერს ჯანეზაშვილი.
ის აღნიშნავს, რომ ჩინჩალაძის კანდიდატურის განხილვისას, განსხვავებული აზრი არავის დაუფიქსირებია.
"ალბათ გაინტერესებთ როგორ ტარდება კონსულტაციები ჩინჩალაძეის დანიშვნაზე თბილისის სააპელაციო სასამართლოს თავმჯდომარის პოსტზე 5 წლის ვადით?
საბჭოს სხდომაზე ონლაინ ჩაერთო დარბაზში შეკრებილი უამრავი მოსამართლე და გამოვიდნენ ჩინჩალაძის მხარდამჭერი სიტყვით. ძირითადი არგუმენტები იხ. ქვემოთ.
- ირაკლი შენგელია: თუ ვინმე უნდა იყოს თბილისის სააპელაციო სასამართლოს თავმჯდომარე, მაშინ მიხეილ ჩინჩალაძე. სრულად გამართულად მუშაობდა სასამართლო მისი თავმჯდომარეობის დროს, ერთი შეფერხებაც კი არ ყოფილა
- დიმიტრი გვრიტიშვილი: ვეთანხმები ბატონ ირაკლის, მიხეილ ჩინჩალაძე არის ღირსეული კანდიდატურა, სათანადო უნარებით აღჭურვილი. კოლექტივში არის ჯანსაღი და საქმიანი სიტუაცია. თუ ინფრასტრუქტურის პრობლემა წარმოიშვება მყისიერად გვარდება, მენეჯმენტი მართლაც გამართულია
- მამისეიშვილი: დაახლოებით 10 თვეა აქ ვმუშაობ. აღფრთივანებული ვარ. სხვა ალტერნატივა არ არის
- ბუგიანიშვილი: სრულად მხარს ვუჭერ
- ტყავაძე: მეც მხარს ვუჭერ, წლებია ვიცნობ. სასამართლოში გავიცანი მისი უნარები, ვიცი სასამართლოს აპარატი გამართულად მუშაობს
- ჯეირანაშვილი: მხარს ვუჭერ, დიდი დამსახურება აქვს
- ლაშა თავართქილაძე: მართლაც ღირსეული კანდიდატია, კიდევ გააგრძელებს ღირსეულ საქმიანობას, თქვენი მხარდამჭერის შემთხვევაში
- მარიამ ცისკაძე: ხმა არ ისმოდა ნორმალურად რა თქვა, მაგრამ ჩინჩალაძეს მხარს უჭერს.
ასევე, მხარდამჭერი სიტყვით გამოვიდა ლავრენტი მაღლაკელიძე.
განსხვავებული აზრი არ ყოფილა".- წერს ჯანეზაშვილი.
თბილისის სააპელაციო სასამართლოს თავმჯდომარის პოზიციაზე იუსტიციის საბჭოში მხოლოდ მიხეილ ჩინჩალაძის კანდიდატურა იყო წარდგენილი. ის ამავე თანამდებობაზე 2017 წელს დაინიშნა, ხოლო 5-წლიანი მუშაობის ვადა 2022 წლის მაისის ბოლოს ამოეწურა.
სააპელაციო სასამართლოს თავმჯდომარე სააპელაციო სასამართლოს წევრი მოსამართლეებიდან ირჩევა. თანამდებობაზე შერჩეულ პირს ნიშნავს იუსტიციის უმაღლესი საბჭო.