ცენტრალური და აღმოსავლეთ ევროპის ცხრა ქვეყნის ლიდერმა NATO-ს აღმოსავლეთ ფლანგზე გაძლიერებისკენ მოუწოდა.
ბულგარეთის, ჩეხეთის, ესტონეთის, უნგრეთის, ლატვიის, ლიტვის, პოლონეთის, რუმინეთისა და სლოვაკეთის ლიდერები რუმინეთის დედაქალაქ ბუქარესტში, მადრიდში NATO-ს სამიტამდე სამი კვირით ადრე შეხვდნენ.
ასევე, ბუქარესტში შეკრებილმა ევროპის ლიდერებმა რუსეთის შემოჭრის ფონზე NATO-ს "დაუცველი პარტნიორების", მოლდოვასა და საქართველოს უსაფრთხოების აუცილებლობაზე ისაუბრეს.
შეხვედრა რუმინეთის პრეზიდენტმა, კლაუს იოჰანისმა პოლონელ კოლეგასთან, ანდჟეი დუდასთან ერთად გახსნა.
"რუმინეთსა და შავ ზღვაში უსაფრთხოების გაზრდილი რისკის გათვალისწინებით, NATO-ს ერთიანობა მის აღმოსავლეთ ფლანგზე, უფრო აქტუალური და გადამწყვეტი ხდება". - აღნიშნა იოჰანისმა.
რუმინეთის პრეზიდენტის თქმით, სამიტზე გრძელვადიან ხედვებზე ისაუბრებენ, ასევე ყურადღების ცენტრში თავდაცვა და ალიანსის მე-5 მუხლი მოექცევა, რომლის მიხედვითაც, ერთ წევრზე თავდასხმა, ყველა მათგანზე თავდასხმას ნიშნავს.
